சட்டவிரோதமாக நுழைந்த 20 மியான்மர் நாட்டினர் கைது!
- Shan Siva
- 11 May, 2026
கோலாலம்பூர். மே 11: மலேசியா-தாய்லாந்து எல்லையிலுள்ள ரந்தாவ் பாஞ்சாங், பாசிர் மாஸ் பகுதியில், சுங்கை கோலோக் வழியாகப் படகு மூலம் மலேசியாவிற்குள் நுழைந்ததாக நம்பப்படும் 20 மியான்மர் நாட்டினரை, பொது நடவடிக்கைப் படை (GOF) பட்டாலியன் 7 கைது செய்தது.
நேற்று முன் தினம் காலை சுமார் 8 மணியளவில், 'ஆபரேஷன் டாரிங் டெல்டா' நடவடிக்கையின் மூலம், தென்கிழக்கு படைப்பிரிவு தலைமையகத்தின் புலனாய்வுப் பிரிவு உறுப்பினர்களும், GOF பட்டாலியன் 7-இன் புலனாய்வுப் பிரிவு உறுப்பினர்களும் இணைந்து அவர்கள் அனைவரையும் கைது செய்ததாக GOF தென்கிழக்கு படைப்பிரிவு தளபதி எஸ்.ஏ.சி. அஹ்மத் ராட்ஸி ஹுசைன் தெரிவித்தார்.
ரந்தாவ் பாஞ்சாங்கில் உள்ள சுல்தான் இஸ்மாயில் பெட்ரா மசூதியின் வாகன நிறுத்துமிடத்தில், சந்தேகத்திற்கிடமான நிலையில் இருந்த இரண்டு வாகனங்களை ரோந்துப் பணியில் ஈடுபட்டிருந்த வீரர்கள் பின்தொடர்ந்து சென்று கைது செய்ததாக அவர் கூறினார்.
இருப்பினும், சம்பந்தப்பட்ட வாகனங்களின் இரண்டு ஓட்டுநர்களும் தப்பி ஓடிவிட்டனர், மேலும் அவர்கள் பிடிபடவில்லை. ஆய்வின்போது, டொயோட்டா இன்னோவாவில் 11 பேரும், நிசான் செரீனாவில் ஒன்பது பேரும் என மொத்தம் 20 மியான்மர் நாட்டினர் பயணிகள் பகுதியில் இருந்தது கண்டறியப்பட்டது என்று அவர் நேற்று ஒரு அறிக்கையில் தெரிவித்தார்.
சோதனையின் முடிவுகளின்படி, ஏழு பேரிடம் மட்டுமே கடவுச்சீட்டுகள் இருந்தும் மலேசியாவிற்குள் நுழைவதற்கான செல்லுபடியாகும் முத்திரை இல்லை என்றும், மற்ற 13 பேர் எந்த அடையாள ஆவணங்களையும் சமர்ப்பிக்கத் தவறிவிட்டனர் என்றும் அவர் கூறினார்.
மேலும், ஏழு கடவுச்சீட்டுகள், 22 கைபேசிகள் மற்றும் இரண்டு வாகனங்களையும் GOF பறிமுதல் செய்தது. பறிமுதல் செய்யப்பட்டவற்றின் மொத்த மதிப்பு RM88,200 என மதிப்பிடப்பட்டுள்ளது என்று அவர் கூறினார்!
Leave a Reply
Your email address will not be published. Required fields are marked *
தேடல்
செய்தி வகை
