12 ஆண்டுகளுக்குப் பிறகு அரிய நீலகிரி கருங்குரங்கு இனத்தில் புதிய குட்டி பிறப்பு

Surendran Sumdraraj
18 Jul, 2026

கேரளா, ஜூலை 18-

கேரள மாநிலம் திருவனந்தபுரம் உயிரியல் பூங்காவில், அரிய வகையைச் சேர்ந்த நீலகிரி கருங்குரங்கு இனத்தில் 12 ஆண்டுகளுக்குப் பிறகு புதிய குட்டி பிறந்துள்ளது. இந்த அரிய நிகழ்வு வனவிலங்கு ஆர்வலர்கள் மற்றும் உயிரியல் பூங்கா நிர்வாகத்தினரிடையே மகிழ்ச்சியை ஏற்படுத்தியுள்ளது. கடந்த 2014-ஆம் ஆண்டு இந்த இனத்தில் ‘சோனா’ என்ற பெண் குட்டி பிறந்ததற்குப் பிறகு, தற்போது மீண்டும் ஒரு புதிய குட்டி பிறந்துள்ளது.

உயிரியல் பூங்காவில் பராமரிக்கப்பட்டு வரும் ‘ராஜு’ மற்றும் ‘ரஞ்சினி’ என்ற நீலகிரி கருங்குரங்குகளுக்கு இந்தக் குட்டி பிறந்துள்ளது. தாயும் குட்டியும் நல்ல உடல்நலத்துடன் இருப்பதாகவும், கால்நடை மருத்துவர்கள் மற்றும் வனவிலங்கு பராமரிப்பாளர்கள் தொடர்ந்து கண்காணித்து வருவதாகவும் பூங்கா நிர்வாகம் தெரிவித்துள்ளது. குட்டியின் வளர்ச்சி மற்றும் உடல்நலன் குறித்து சிறப்பு கவனம் செலுத்தப்பட்டு வருகிறது.

மேற்குத் தொடர்ச்சி மலைப் பகுதிகளில் மட்டுமே காணப்படும் நீலகிரி கருங்குரங்கு, அழியும் அபாயத்தில் உள்ள அரிய விலங்கு இனங்களில் ஒன்றாகும். வாழ்விட இழப்பு, வனச்சூழல் மாற்றம் மற்றும் மனித தலையீடு காரணமாக இந்த இனத்தின் எண்ணிக்கை குறைந்து வருவதாக வனவிலங்கு நிபுணர்கள் தெரிவிக்கின்றனர். இந்த நிலையில், 12 ஆண்டுகளுக்குப் பிறகு உயிரியல் பூங்காவில் புதிய குட்டி பிறந்திருப்பது இனப்பெருக்கப் பாதுகாப்பு முயற்சிகளுக்குக் கிடைத்த முக்கிய வெற்றியாகக் கருதப்படுகிறது.

Your email address will not be published. Required fields are marked *

முக்கிய செய்தி