• Sangeetha K Loganathan
• 17 Jun, 2025

கோலாலம்பூர், ஜூன் 17:

மஇகாவின் முன்னாள் தலைவர் ஜி. பழனிவேல் இன்று காலை கோலாலம்பூர் மருத்துவமனையில் காலமானார். 76 வயதான அவர்  காலை 8 மணிக்கு காலமானார் என்று மஇகா உதவித்  தலைவர் டி. முருகையா தெரிவித்ததாக பெர்னாமா செய்தி வெளியிட்டுள்ளது. கேமரன் ஹைலேண்ட்ஸின் முன்னாள் எம்.பி.யான பழனிவேல், 1968 இல் மஇகாவில் ஒரு சாதாரண உறுப்பினராக சேர்ந்தார். நீண்ட காலமாக மஇகாவை தலைவராகக் கொண்டிருந்த எஸ்.சாமி வேலு 31 ஆண்டுகள் மஇகாவை வழிநடத்திய பின்னர் 2010 இல் பதவி விலகியபோது, பழனிவேல் கட்சியின் தலைமைப் பொறுப்பை ஏற்றுக்கொண்டார்.

 பினாங்கில் பிறந்த பழனிவேல் ஆகஸ்ட் 2011 முதல் மே 2013 வரை பிரதமர் துறையில் அமைச்சராகவும், மே 2013 முதல் ஜூலை 2015 வரை இயற்கை வளங்கள் மற்றும் சுற்றுச்சூழல் அமைச்சராகவும் பணியாற்றினார். கிராமப்புற மேம்பாட்டு அமைச்சகம் (1999-2004), மகளிர், குடும்பம் மற்றும் சமூக நல மேம்பாட்டு அமைச்சகம் (2004-2009), தோட்டத் தொழில மற்றும் மூலப்பொருட்கள் அமைச்சகம் (2009-2011) ஆகியவற்றில் துணை அமைச்சர் பதவிகளையும் வகித்தார்.

2013 முதல் 2018 வரை கேமரன் ஹைலேண்ட்ஸ் எம்.பி.யாக பணியாற்றியதோடு மட்டுமல்லாமல், 1990 முதல் 2008 வரை ஹுலு சிலாங்கூர் எம்.பி.யாகவும் இருந்தார். 2015 ஆம் ஆண்டு அப்போதைய மஇகா துணைத் தலைவர் டாக்டர் எஸ். சுப்பிரமணியத்துடன் தலைமைப் போட்டி ஏற்பட்டதைத் தொடர்ந்து மஇகா உறுப்பினராக இருந்து விலகினார்.