வெளிப்படையாக விற்கப்படும் கொடூர போதை வஸ்து! காவல்துறை அதிர்ச்சி தகவல்

Shan Siva
21 Apr, 2026

கோலாலம்பூர், ஏப் 21: மார்பின் எனும் கொடூரப் போதைப்பொருளை விட 50 முதல் 100 மடங்கு அதிக வீரியம் கொண்ட ஃபென்டானில் எனும் வீரியமிக்க போதை வஸ்து, தற்போது வேப் சந்தையில் வெளிப்படையாகவே விற்கப்படும் சம்பவம் வெளிச்சத்திற்கு வந்துள்ளது. இதனைக் காவல்துறை கண்டறிந்து அதிர்ச்சி தெரிவித்துள்ளது.

ஃபென்டானில் போதை வஸ்துவின் அபாயகரமான, சட்டவிரோத, தெருவோர வகையான ஃபியூரானைல் ஃபென்டானில், குறிப்பிட்ட சில வேப் விற்பனை நிலையங்களில் விற்கப்படுவதை காவல்துறை கண்டுபிடித்ததாக புக்கிட் அமான் போதைப்பொருள் குற்றப் புலனாய்வுத் துறை இயக்குநர் டத்தோ ஹுசைன் உமர் கான் கூறினார்.

தனித்தனியாக நடத்தப்பட்ட சோதனைகளில் ஐந்து பேர் கைது செய்யப்பட்டதைத் தொடர்ந்து இது வெளிச்சத்திற்கு வந்ததாக அவர் கூறினார்.

ஏப்ரல் 17 அன்று செந்தூலில் உள்ள ஒரு வேப் விற்பனை நிலையத்தில் நடத்தப்பட்ட ஆய்வில், ஃபியூரானைல் ஃபென்டானில் என நம்பப்படும் சம்பந்தப்பட்ட பொருளைக் கொண்ட 155 வேப் கார்ட்ரிட்ஜ்கள் கண்டுபிடிக்கப்பட்டதாக அவர் கூறினார். இது தொடர்பாக இருவர் கைது செய்யப்பட்டதாகவும் அவர் தெரிவித்தார்.

ஏப்ரல் 13 அன்று செராஸில் நடத்தப்பட்ட மற்றொரு சோதனையில் மூன்று பேர் கைது செய்யப்பட்டதோடு, ஃபியூரானைல் ஃபென்டானில் என சந்தேகிக்கப்படும் திரவத்தைக் கொண்ட ஒன்பது வெள்ளை பாட்டில்களும் பறிமுதல் செய்யப்பட்டன.

கைப்பற்றப்பட்ட ஃபியூரானைல் ஃபென்டானிலின் மொத்த அளவு 18.56 கிலோ எனக் குறிப்பிட்ட அவர், அவற்றின் மொத்த மதிப்பு 28 லட்சம் ரிங்கிட் என கோலாலம்பூர் காவல் தலைமையகத்தில் இன்று நடைபெற்ற செய்தியாளர் சந்திப்பில் ஹுசைன் கூறினார்.

ஃபியூரனைல் ஃபென்டானில் என்பது ஃபென்டானிலின் ஒரு அபாயகரமான, சட்டவிரோத, தெருக்களில் விற்கப்படும் வகையாகும். இது கணிக்க முடியாத வீரியத்தையும், கட்டுப்பாடற்ற சூழல்களில் அளவுக்கு அதிகமாக உட்கொள்வதால் ஏற்படும் மிக அதிக ஆபத்தையும் கொண்டது.

கைது செய்யப்பட்ட ஐந்து பேரும் அந்த வேப் விற்பனை நிலையங்களின் உரிமையாளர்களாகவோ அல்லது அங்கு பணிபுரிந்தவர்களாகவோ இருந்தனர் என்றும் அவர் மேலும் கூறினார்.

தனித்தனியாக, ஏப்ரல் 16 அன்று கோலாலம்பூரைச் சுற்றி நடத்தப்பட்ட பல சோதனைகளின் போது 19 பேர் கைது செய்யப்பட்டதைத் தொடர்ந்து, தனது துறை ஒரு போதைப்பொருள் கடத்தல் கும்பலை ஒழித்துள்ளதாக ஹுசைன் கூறினார்.

மொத்தத்தில், காவல்துறை 31.8 கிலோ கெட்டமைன், 6.5 கிலோ MDMA, 4.2 கிலோ எரிமின் 5 மற்றும் 0.89 கிலோ எக்ஸ்டஸி மாத்திரைகளைக் கைப்பற்றியது. இவற்றின் மொத்த மதிப்பு 31 லட்சம் ரிங்கிட் ஆகும்.

இது தவிர், ரோல்ஸ்-ராய்ஸ் கல்லினன் பிளாக் பேட்ஜ் மற்றும் போர்ஷே டைகான் 4எஸ் உள்ளிட்ட 18 சொகுசு வாகனங்களும் பறிமுதல் செய்யப்பட்டன.

இந்த நடவடிக்கையின் போது, போதைப்பொருள் கடத்தல் நடவடிக்கைகளிலிருந்து பெறப்பட்டதாக சந்தேகிக்கப்படும், பல்வேறு நாடுகளைச் சேர்ந்த சுமார் RM 49 லட்சம் ரிங்கிட் மதிப்பிலான பணத்தையும் காவல்துறை பறிமுதல் செய்ததாக அவர் கூறினார்.

பறிமுதல் மற்றும் முடக்கப்பட்ட பொருட்களின் மொத்த மதிப்பு RM14.15 மில்லியன் என்று ஹுசைன் தெரிவித்தார்.

இந்தக் கும்பல், அந்நியச் செலாவணி பரிமாற்ற வணிகம் என்ற போர்வையில் செயல்பட்டு வந்ததும் தெரியவந்துள்ளதாக அவர் தெரிவித்தார்!

Your email address will not be published. Required fields are marked *

முக்கிய செய்தி