• Shan Siva
• 07 Jan, 2026

கோலாலம்பூர், ஜான் 7: தொழிலாளர் தொடர்புடைய மூன்று அரசுத் துறைகளை மறுசீரமைக்க அரசு திட்டமிட்டு வருவதாக  மனிதவள அமைச்சர் டத்தோ’ ஸ்ரீ ஆர். ரமணன் தெரிவித்துள்ளார்.

இன்று தீபகற்ப மலேசியா தொழிலாளர் துறையான JTKSM ஐப் பார்வையிட்ட பின்னர் செய்தியாளர்களிடம் பேசிய அவர், இந்த மறுசீரமைப்பில் தீபகற்ப மலேசியா தொழிலாளர் துறை (JTKSM), வேலைவாய்ப்பு ஒருங்கிணைப்பு துறை (JHEKS) மற்றும் தொழில்துறை உறவுகள் துறை (DPP) ஆகிய மூன்று துறைகள் இணைக்கப்பட உள்ளதாக கூறினார்.

தொழிலாளர் தொடர்பான அமலாக்கம், புகார் தீர்வு உள்ளிட்ட விவகாரங்களில் துறைகளுக்கிடையிலான ஒட்டுமொத்தப் பணிகளை நீக்கி, ஒருங்கிணைப்பை மேம்படுத்துவதே இந்த நடவடிக்கையின் நோக்கம் என அவர் விளக்கினார்.

தற்போது, ஒரே சங்கிலியில் தொடர்புடைய பிரச்சினைகள் இருந்தபோதிலும், அவை வேறு வேறு துறைகளால் கையாளப்படுவதால் செயல்திறன் குறைவு மற்றும் தேவையற்ற பணிகள் இரட்டிப்பாக நடைபெறுகின்றன என்றும் அமைச்சர் தெரிவித்தார்.

ஒரே ஒரு பிரச்சினையை தீர்க்க பல துறைகளுடன் அதிகாரிகள் தொடர்பு கொள்ள வேண்டிய நிலை இருப்பதால், அமலாக்க நடவடிக்கைகள் சிக்கலாகி, தரைப்பரப்பில் செயல்பாடுகள் தாமதமடைவதாகவும் அவர் கூறினார்.

மூன்று துறைகளையும் ஒருங்கிணைப்பதன் மூலம், மனிதவளமும் வளங்களும் சிறப்பாக பகிர்ந்தளிக்கப்படும் என்றும், குறிப்பாக அமலாக்க அதிகாரிகள் பற்றாக்குறையை சமாளிக்க இது உதவும் என்றும் ரமணன் தெரிவித்தார்.

தற்போது தீபகற்ப மலேசியாவில் 300 அமலாக்க அதிகாரிகளும், சபா மற்றும் சரவாக்கில் 100 அதிகாரிகளும் மட்டுமே பணியாற்றி வருவதாக அவர் தெரிவித்தார்.

இந்த மறுசீரமைப்பின் மூலம் தொழிலாளர் நீதிமன்றங்களும் மேலும் திறம்பட செயல்பட முடியும் என்றும், தனித்தனி துறைகளில் இருந்து அல்லாமல் ஒருங்கிணைந்த நிர்வாக அமைப்பிலிருந்து பணியாளர்கள் மற்றும் ஆதரவு வழங்கப்படும் என்றும் அவர் கூறினார்.

மறுசீரமைப்பின் விவரங்கள், புதிய அமைப்பு மற்றும் இணைந்த துறைக்கு வழங்கப்படவுள்ள பெயர் உள்ளிட்டவை மேலதிக ஆலோசனைகளுக்குப் பிறகு அமைச்சகத்தால் இறுதி செய்யப்படும் என்றும் அமைச்சர் தெரிவித்தார்.

இந்த நடவடிக்கை தொழிலாளர் நிர்வாகத்தை மேலும் எளிமையாகவும், தொழிலாளர்களும் முதலாளிகளும் சந்திக்கும் சிக்கல்களுக்கு விரைவான தீர்வுகளை வழங்கும் வகையிலும் அமைக்கப்படும் என்றும் அவர் கூறினார்.

“செயல்முறைகள் மக்களுக்கு எளிதாக இருக்க வேண்டும்; சிரமமாக அல்ல,” எனக் கூறிய அமைச்சர், சேவை வழங்கல் மற்றும் அமலாக்க செயல்திறனை மேம்படுத்தும் பரந்த முயற்சிகளின் ஒரு பகுதியாகவே இந்த மறுசீரமைப்பு அமைகிறது என்றார்!