• Shan Siva
• 06 Nov, 2024

கோலாலம்பூர், நவம்பர் 6: அமெரிக்க அதிபர் தேர்தலில் டொனால்ட் டிரம்ப் வெற்றி பெற்றதையடுத்து, முன்னாள் அதிபருக்கு "குறிப்பிடத்தக்க" அரசியல் மறுபிரவேசம் என்று மலேசியப் பிரதமர் டத்தோஸ்ரீ அன்வார் இப்ராஹிம் தெரிவித்துள்ளார். மேலும், அமெரிக்க அதிபர் தேர்தலில் டிரம்ப் வெற்றி பெற்றதற்கு தனது வாழ்த்துகளையும் அன்வார் தெரிவித்துள்ளார்.

இந்த புதிய அத்தியாயம் புதுப்பிக்கப்பட்ட வாய்ப்புகளைக் கொண்டுவருவதோடு, நம்பிக்கை, ஒத்துழைப்பு மற்றும் பகிரப்பட்ட நோக்கத்துடன் முன்னேற நாங்கள் தயாராக இருக்கிறோம் என்று தெரிவித்துள்ளார்.

இரு நாட்டு மக்களுக்கும் பரஸ்பர நன்மைகளை வளர்ப்பதற்காக புதிய அதிபருடன் நெருக்கமாகப் பணியாற்றும் சூழலை எதிர்நோக்குகிறோம் என்று அவர் பதிவிட்டுள்ளார்.

பாலஸ்தீனம் மற்றும் உக்ரைனில் நடந்து வரும் மோதலை முடிவுக்குக் கொண்டுவர அமெரிக்கா தனது "கணிசமான செல்வாக்கை" பயன்படுத்த வேண்டும் என்றும் அன்வார் வலியுறுத்தினார்.

மலேசியாவின் மிகப்பெரிய வெளிநாட்டு முதலீட்டு மூலமும், ஆசிய-பசிபிக் பிராந்தியத்தில் அமெரிக்காவும் முக்கிய பங்கு வகிக்கிறது என்று குறிப்பிட்ட அன்வார், மலேசியா அடுத்த ஆண்டு ஆசியான் தலைவர் பதவியை ஏற்கும் போது, ​​தென்கிழக்காசியாவுடனான தனது ஈடுபாட்டை வல்லரசு மீண்டும் புதுப்பிக்கும் என்று தாம் நம்புவதாக அன்வார் குறிப்பிட்டுள்ளார்!