டிரம்பை கொல்ல சதி திட்டம்; மேலும் 2 பேர் கைது

Surendran Sumdraraj
24 Jun, 2026

வாஷிங்டன், ஜூன் 24 –

அமெரிக்க அதிபர் டொனால்ட் டிரம்பை குறிவைத்து தாக்குதல் நடத்த சதி திட்டம் தீட்டியதாகக் கூறப்படும் வழக்கில் மேலும் இருவர் கைது செய்யப்பட்டுள்ளனர். இதன் மூலம் இந்த வழக்கில் கைது செய்யப்பட்டவர்களின் எண்ணிக்கை ஏழாக உயர்ந்துள்ளது.

அமெரிக்க நீதித்துறை மற்றும் எஃப்பிஐ வெளியிட்ட தகவலின்படி, வெள்ளை மாளிகையில் கடந்த ஜூன் 14-ஆம் தேதி நடைபெற்ற UFC நிகழ்ச்சியை குறிவைத்து தாக்குதல் நடத்தும் திட்டம் தீட்டப்பட்டதாக விசாரணையில் தெரியவந்துள்ளது. இந்த சதித் திட்டத்தில் தொடர்புடையதாக வில்லியம் லீ ஸ்பார்டகஸ் ஃபாக்னர் மற்றும் ஜோர்டன் ரிங்கர் ஆகியோர் கைது செய்யப்பட்டுள்ளனர்.

சந்தேக நபர்கள் வெடிபொருட்கள் பொருத்தப்பட்ட டிரோன்களைப் பயன்படுத்தி தாக்குதல் நடத்தவும், பின்னர் தப்பிச் செல்லும் மக்களை குறிவைத்து துப்பாக்கிச் சூடு நடத்தவும் திட்டமிட்டிருந்ததாக விசாரணை அதிகாரிகள் தெரிவித்துள்ளனர். இருப்பினும், திட்டம் செயல்படுத்தப்படுவதற்கு முன்பே பாதுகாப்பு அமைப்புகள் நடவடிக்கை எடுத்து அதை முறியடித்தன.

இந்த சதித் திட்டம் குறித்து சந்தேக நபர்களில் ஒருவரின் தாயார் அளித்த தகவலின் அடிப்படையில் விசாரணை தொடங்கப்பட்டதாகவும், பின்னர் ஆயுதங்கள், குறியாக்க தகவல் தொடர்புகள் மற்றும் தாக்குதல் தொடர்பான ஆதாரங்கள் கைப்பற்றப்பட்டதாகவும் அதிகாரிகள் தெரிவித்துள்ளனர்.

Your email address will not be published. Required fields are marked *

முக்கிய செய்தி