பங்களதேஷிலிருந்து வரப்போகும் 2 லட்சம் தொழிலாளர்கள்!
- Shan Siva
- 01 Sep, 2026
கோலாலம்பூர், செப் 1: அடுத்த ஆறு மாதங்களில் பங்களாதேஷிலிருந்து சுமார் 200,000 புலம்பெயர் தொழிலாளர்களை மலேசியா பணியமர்த்தும் என்றும், இந்த ஆட்சேர்ப்பு பல்வேறு முகமைகள் மூலம் மேற்கொள்ளப்படும் என்றும் பங்களாதேஷ் தெரிவித்துள்ளது.
இந்த ஆட்சேர்ப்பு செப்டம்பர் மாத இறுதியில் இருந்து கட்டம் கட்டமாகத் தொடங்கும் என்று பங்களாதேஷ் உள்ளாட்சி, ஊரக வளர்ச்சி மற்றும் கூட்டுறவுத் துறை இணை அமைச்சர் மிர் ஷாஹே ஆலம் கூறினார்.
மலேசியாவில் சுமார் 8 லட்சம் பதிவு செய்யப்பட்ட பங்களாதேஷ் தொழிலாளர்கள் உள்ளனர். அவர்களில் சிலர் பதிவு செய்யப்படாதவர்களாகவும் உள்ளனர்.
அவர்களைப் பதிவு செய்யுமாறு மலேசிய அதிகாரிகளிடம் தங்கள் அமைச்சர் கேட்டுக்கொண்டுள்ளார் என்று அவர் கூறியதாக 'தி டெய்லி ஸ்டார்' செய்தி வெளியிட்டுள்ளது.
பங்களாதேஷுக்கான மலேசிய உயர் ஆணையர் ஷுஹாதா ஒஸ்மான், உள்ளாட்சி, ஊரக வளர்ச்சி மற்றும் கூட்டுறவுத் துறை அமைச்சர் அப்துல் மொயீன் கானை சந்தித்த பிறகு, அவர் செய்தியாளர்களிடம் பேசினார்.
ஜூன் மாதம், பங்களாதேஷ் பிரதமர் தாரிக் ரஹ்மான் மலேசியாவிற்கு வருகை தந்து, பங்களாதேஷ் புலம்பெயர் தொழிலாளர்களுக்காக தொழிலாளர் சந்தையை மீண்டும் திறப்பது குறித்து பரிசீலிக்குமாறு பிரதமர் அன்வார் இப்ராஹிமை வலியுறுத்தினார்.
கடன் அடிமைத்தனம் மற்றும் கட்டாய உழைப்பு குறித்த அறிக்கைகளுக்கு மத்தியில், 2024 முதல் பங்களாதேஷில் இருந்து தொழிலாளர்களைப் பணியமர்த்துவதற்கு புத்ராஜெயா தடை விதித்துள்ளது.
2030-ஆம் ஆண்டுக்குள் மலேசியாவில் உள்ள வெளிநாட்டுத் தொழிலாளர்களின் எண்ணிக்கையை மொத்த தொழிலாளர் சக்தியில் சுமார் 10% ஆகக் குறைக்க அரசாங்கம் நம்புகிறது.
Leave a Reply
Your email address will not be published. Required fields are marked *
தேடல்
செய்தி வகை
