• Shan Siva
• 16 Nov, 2024

லிமா, நவம்பர் 16: 2025 ஆம் ஆண்டில் ஆசியான் அமைப்பின் தலைவராக மலேசியாவுக்கு ஜப்பான் தனது ஆதரவைத் தெரிவித்துள்ளது, அதே நேரத்தில் புத்ராஜெயா தனது கிழக்கு நோக்கிய கொள்கையை, குறிப்பாக கல்வி மற்றும் தொழில்நுட்ப பரிமாற்றத்தில் தொடர விரும்புகிறது என்று பிரதமர் டத்தோஸ்ரீ அன்வார் இப்ராகிம் கூறினார்.

ஜப்பானிய பிரதமர் ஷிகெரு இஷிபாவுடனான இருதரப்பு சந்திப்பின் போது, ​​வர்த்தகம், எரிசக்தி மாற்றம், பாதுகாப்பு, கடல்சார், கல்வி மற்றும் கலாச்சாரம் உள்ளிட்ட பல்வேறு துறைகளில் இரு நாடுகளுக்கும் இடையிலான ஒத்துழைப்பின் முன்னேற்றத்தையும் மதிப்பீடு செய்ததாக அவர் கூறினார்.

தென் சீனக் கடல் மற்றும் மியான்மரின் தற்போதைய நிலைமை தொடர்பான பிரச்சனைகள் குறித்தும் தாங்கள் விவாதித்ததாக  2024 APEC உச்சிமாநாட்டின் ஓர் அமர்வில் கூறினார்.

அடுத்த ஆண்டு ஜனவரி 1 ஆம் தேதி தொடங்கும் ஆசியான் நிகழ்வின் போது மலேசியா ஜப்பானுடனான தனது உறவை நிச்சயமாக வலுப்படுத்தும் என்று இஷிபாவுக்கு உறுதியளித்ததாகவும் அன்வார் கூறினார்.

மலேசியாவின் தொழில்துறை முன்னேற்றத்தை ஆதரிக்கும் முதல் நாடுகளில் ஜப்பான் ஒன்றாகும் என்றும், இந்த பகுதியில் ஒத்துழைப்பைத் தொடர தமது மடானி அரசாங்கம் விரும்புகிறது என்றும் அன்வார் கூறினார்.

மலேசியா மற்றும் ஜப்பான் இடையேயான உறவு தொடர்ந்து வலுப்பெறும் என்று தாம் நம்புவதாகவும், இதன் மூலம் நாட்டின் முன்னேற்றம் மற்றும் பொருளாதார ஆற்றலுக்கு அதிக முதலீடுகளை ஈர்க்க வழிவகை செய்யும் என்றும் அவர் மேலும் கூறினார்!