• Muthu Kumar
• 21 Jan, 2025

(மு.ஆசைதம்பி)

ஈப்போ, ஜன.21

வெட்டி பசங்க, விளையாட்டுப் பசங்க போன்ற பல தரமான வெற்றிப் படங்களை தயாரித்த வீடு புரோடெக்ஷன் தயாரிப்பில் வெளிவரவுள்ள தமிழ் ஸ்கூல் பசங்க திரைப்படத்தின் முன்னோட்டக் காட்சி ஈப்போ எல்.எஃப்.சி திரையரங்கத்தில் நடைபெற்றது.

இதில் உள்நாட்டுக் கலைஞர்களும், தலைமையாசிரியர்களும்,ஆசிரியர்களும் கலந்து கொண்டு சிறப்பித்தனர். டெனிஷ் குமார் நடிப்பில் வெளிவந்த இத்திரைப்படம் ரசிகர்களையும் மாணவர்களையும் கவர்ந்துள்ளது. ஜனவரி 23 ஆம் தேதி முதல் நாடு முழுவதும் திரையரங்குகளில் வெளியீடு காண்கிறது.

டெனிஷ் குமார், டாக்டர் விமலா பெருமாள் தயாரிப்பிலும் ஷான் இயக்கத்திலும் வெளிவர உள்ள இந்த திரைப்படத்தில் டெனிஷ் குமார், வித்தியா, குபேன் மகாதேவன்,பென் ஜி.யாஸ்மின் நடியா,மலர்விழி ஆகியோர் தங்களுக்கு கொடுத்த கதாபாத்திரத்திற்கு உயிரூட்டி உள்ளனர்.

தோட்டத்தில் இருக்கும் தமிழ்பள்ளிகளில் நடக்கும் விஷயங்களை துல்லியமாக படம் பிடித்துக் காட்டியுள்ளார் இயக்குநர். டெனிஷ்குமார் பள்ளிக்கூட வாத்தியாராக சிறப்பான நடிப்பை தந்துள்ளார். அதுபோல ஆசிரியையாக வரும் திவ்யா சிறப்பான முறையில் நடித்து ரசிகர்களை கவர்ந்துள்ளார். பள்ளிக்கூட மாணவர்களும் சிறப்பான நடிப்பை தந்துள்ளனர்.

பள்ளிப் பருவத்தின் நினைவுகளை மீண்டும் கண் முன்னே நிறுத்தும் முயற்சியாக இந்த திரைப்படம் இருக்கும்.சமூக சிந்தனையுடன் ஓர் ஆசிரியரின் அர்ப்பணிப்பு எவ்வாறு இருக்கும் என இந்த திரைப்படத்தில் காணலாம்.