• Muthu Kumar
• 22 Dec, 2024

சில மாதங்களுக்கு முன்பு தனது மனைவி ஆர்த்தியை விவாகரத்து செய்வதாக நடிகர் ஜெயம் ரவி அறிவித்தார். இருவரும் சுமூகமாக பேசி கடினமான இந்த முடிவை எட்டி இருப்பதாகவும் தெரிவித்தார்.
ஆனால் தன்னிடம் எதுவும் தெரிவிக்காமல் இப்படி ஒரு அறிவிப்பை ஜெயம் ரவி வெளியிட்டு இருப்பதாக ஆர்த்தி அதிர்ச்சி தகவலை கூறியிருந்தார். மேலும் ஜெயம் ரவியை தொடர்பு கொள்ள முடியாமல் குழந்தைகளுடன் தவித்து வருவதாகவும் ஆர்த்தி கூறியிருந்தார்.

இதைதொடர்ந்து மனைவியிடம் இருந்து விவாகரத்து கோரி நடிகர் ஜெயம் ரவி சென்னை குடும்ப நல நீதிமன்றத்தில் வழக்கு தொடர்ந்தார். கடந்த 15-ம் தேதி ஜெயம் ரவி நீதிமன்றத்தில் நேரில் ஆஜாரான நிலையில் ஆர்த்தி காணொளி காட்சி மூலம் ஆஜார் ஆனார். வழக்கை விசாரித்த நீதிபதி, சமரச தீர்வு மையத்தில் இருவரையும் பேச்சுவார்த்தை நடத்த உத்தரவிட்டிருந்தனர்.

அதன்பின் ஜெயம் ரவி சமரச தீர்வு மையத்துக்கு நேரில் ஆஜரானார். ஆனால் ஆர்த்தி ரவி உடல்நிலை சரியில்லை என காரணம் சொல்லி விசாரணைக்கு வர மறுத்துவிட்டார். மேலும் இந்த சமரச பேச்சுவார்த்தையை தள்ளி வைக்க வேண்டும் எனவும் கேட்டிருந்தார். எனவே விசாரணையை தள்ளிவைத்திருந்தனர்.

இந்த நிலையில் இன்று ஜெயம் ரவி மற்றும் ஆர்த்தி சமரச தீர்வு மையத்தில் ஆஜராகி இருந்தனர். இவர்கள் இருவரையும் மனம்விட்டு பேச சொல்லி நீதிபதி அறிவுறுத்தினார். இதைதொடர்ந்து இருவரும் சுமார் 1 மணிநேரம் மனம் விட்டு பேசினர். எனினும் இந்த பேச்சுவார்த்தையில் சமரச தீர்வு எதுவும் எட்டப்படாத நிலையில், வழக்கின் விசாரணை ஜனவரி 7-ம் தேதிக்கு தள்ளிவைக்கப்பட்டுள்ளது.