அதிகார துஷ்பிரயோக வழக்கு: பெல்டா முன்னாள் தலைமை இயக்குநருக்கு 5 நாள் தடுப்புக்காவல்

Surendran Sumdraraj
07 Sep, 2026

புத்ராஜெயா, செப். 7 –

கோலாலம்பூரில் செயல்படுத்தப்பட்ட ஒரு மேம்பாட்டுத் திட்டத்திற்கான மேம்பாட்டாளரை நியமித்தது மற்றும் பெல்டாவுக்குச் சொந்தமான நிலத்தை விற்பனை செய்தது தொடர்பான அதிகார துஷ்பிரயோக குற்றச்சாட்டில், பெல்டாவின் முன்னாள் தலைமை இயக்குநர் ஒருவர் இன்று முதல் 5 நாட்களுக்கு தடுப்புக்காவலில் வைக்கப்பட்டுள்ளார்.

மலேசிய ஊழல் தடுப்பு ஆணையமான எஸ்.பி.ஆர்.எம். மேற்கொண்டு வரும் விசாரணைக்கு உதவுவதற்காக அந்த நபரை தடுப்புக்காவலில் வைக்க அனுமதி கோரப்பட்டது.

இதையடுத்து, எஸ்.பி.ஆர்.எம். முன்வைத்த மனுவை பரிசீலித்த மாஜிஸ்திரேட் எஸ்ரின் ஸக்காரியா, சம்பந்தப்பட்ட முன்னாள் அதிகாரியை 5 நாட்களுக்கு தடுப்புக்காவலில் வைக்க அனுமதி வழங்கினார்.

கோலாலம்பூரில் உள்ள ஒரு திட்டத்திற்கு மேம்பாட்டாளரை நியமித்ததில் முறைகேடு நடந்திருக்கலாம் என்றும், அதேபோல் பெல்டாவுக்கு சொந்தமான நிலம் விற்பனை செய்யப்பட்டதில் அதிகார துஷ்பிரயோகம் இடம்பெற்றிருக்கலாம் என்றும் சந்தேகிக்கப்படுகிறது.

இந்த விவகாரம் தொடர்பான நிதி பரிவர்த்தனைகள், ஆவணங்கள் மற்றும் நிர்வாக முடிவுகள் குறித்து எஸ்.பி.ஆர்.எம். விரிவான விசாரணையை மேற்கொண்டு வருவதாகக் கூறப்படுகிறது.

Your email address will not be published. Required fields are marked *

முக்கிய செய்தி