• Muthu Kumar
• 22 Nov, 2024

கடந்த ஒரு வாரமாக நயன்தாரா, தனுஷ் இடையிலான மோதல்தான் தமிழ் சினிமாவின் ஹாட் டாபிக்காக பேசப்பட்டு வருகிறது.நயன்தாராவின் கல்யாண காணொளியில் நானும் ரவுடிதான் படக் காட்சிகளை பயன்படுத்த தனுஷ் அனுமதி வழங்க மறுத்த நிலையில் டிரைலரில் பயன்படுத்தப்பட்ட 3 வினாடி காட்சிகளுக்கு 10 கோடி வரை நஷ்டம் கேட்டு நோட்டீஸ் அனுப்பியிருந்தார்.

இதற்கு எதிர்ப்பு தெரிவித்து, நடிகை நயன்தாரா தனுஷ் மீது அடுக்கடுக்கான குற்றச்சாட்டுகளை முன்வைத்தார். உங்கள் பழிவாங்கும் நடவடிக்கையால் நானும் என் கணவரும் பாதிக்கப்பட்டுள்ளோம்.. உங்கள் கீழ்தரமான செயல் பற்றி எனக்கும் என் கணவருக்கும் நன்றாக தெரியும் என காட்டமாக அந்த அறிக்கையில் கூறியிருந்தார். இது சமூக வலைத்தளங்களின் பெரியளவில் பேசுபொருளாக மாறியது.

இந்த நிலையில் இன்று இவர்கள் இருவருக்கும் நெருங்கிய நண்பரான ஆகாஷ் பாஸ்கரன் என்பவரின் திருமணத்தில் இவர்கள் இருவரும் நேருக்கு நேர் சந்தித்துள்ளனர். நடிகை நயன்தாரா, தனது கணவர் விக்னேஷ் சிவனுடன் இந்த திருமணத்தில் பங்கேற்றார். தனுஷ் தனது மேனேஜர் ஷ்ரேயாஷுடன் இந்த விழாவில் பங்கேற்றார். தனுஷ் இயக்கி நடிக்கும் இட்லி கடை படத்தின் தயாரிப்பாளர்தான் இந்த ஆகாஷ் பாஸ்கரன். அதேபோல் சிவகார்த்திகேயன் நடிக்கும் 25-வது படத்தையும் இவர் தான் தயாரிக்கிறார்.

அந்த வகையில் சிவகார்த்திகேயன் தனது மனைவி ஆர்த்தியுடன் இந்த திருமண விழாவில் பங்கேற்றார். சிவகார்த்திகேயன் மனைவி ஆர்த்தி நடிகை நயன்தாரா அருகில் அமர்ந்திருந்தார். அவர்கள் பக்கத்திலேயே தனுஷ் தனது மேனேஜருடன் அமர்ந்திருந்தார். ஆனால் இவர்கள் இருவரும் ஒருவருக்கு ஒருவர் பார்த்துக் கொள்ளவில்லை. இந்த காணொளி தற்போது சமூக வலைத்தளங்களில் வேகமாக பரவி வருகிறது.