• Muthu Kumar
• 19 Jul, 2024

தமிழில் மட்டுமே 'நடிப்பு அசுரன்' ஆக நிரூபித்து வந்த எஸ்.ஜே.சூர்யா, இப்போது பிற மொழிகளிலும் கவனம் செலுத்தத் தொடங்கியிருக்கிறார்.

சமீபத்திய 'இந்தியன் 2' படத்தில் எஸ் ஜே சூர்யாவின் நடிப்பு கவனம் ஈர்த்ததைப் போல அடுத்து வெளிவர உள்ள தனுஷின் ராயன் படத்திலும் அசுரத்தனமான நடிப்பை வெளிப்படுத்தி இருப்பதாக  தகவல். இப்போது ராம்சரண், நானி, விக்ரம், கார்த்தி, ராகவா லாரன்ஸ், பகத் பாசில் என பெரிய படங்களில் நடித்து வருகிறார். அவரது லைன் அப்கள் இனி..

ஷங்கர்- கமல் கூட்டணியின் 'இந்தியன் 2'வில் நடிக்கும் போதே, தெலுங்கில் ராம்சரணை வைத்து ஷங்கர் இயக்கி வரும் 'கேம் சேஞ்சர்' படத்திலும் கமிட் ஆனார் எஸ்.ஜே.சூர்யா. அதன் படப்பிடிப்பு இறுதிக் கட்டத்தை நோக்கி விறுவிறுப்பாக நடந்து வருகிறது. இதற்கிடையே தனுஷுடன் நடித்த 'ராயன்' படம் இம்மாதம் வெளியாகிறது. 'மார்க் ஆண்டனி', 'ஜிகர்தண்டா டபுள் எக்ஸ்' படங்களுக்கு பின்னர் இதில் ஒரு பெரிய அளவில் பெயர் வரும் என்கிறார்கள். இந்த இடைவெளியில் தெலுங்கில் நானியுடன் ஒரு படத்தில் நடித்து முடித்துவிட்டார்.

விக்ரமுடன் நடித்து வரும் 'வீர தீர சூரன்' படப்பிடிப்பு மதுரையில் 30 நாட்களுக்கு மேலாக நடந்து முடிந்தது. அதன் இரண்டாவது ஷெட்யூல் படப்பிடிப்பும் நடந்து வருகிறது. 'சித்தா'வை இயக்கிய அருண் குமார் இதனை இயக்கி வருகிறார். கார்த்திக் சுப்புராஜின் 'ஜிகர்தண்டா டபுள் எக்ஸ்' படத்திற்கு பின் ராகவா லாரன்ஸுடன் மீண்டும் கைகோத்திருக்கிறார் எஸ்.ஜே.சூர்யா. படத்தின் பெயர் 'பென்ஸ்'. இதன் படப்பிடிப்பும் டேக் ஆஃப் ஆக உள்ளது. கார்த்தி நடிப்பில் மித்ரன் இயக்கத்தில் உருவாகிவரும் சர்தார் 2 விலும் நடிக்கிறார்.

தெலுங்கைத் தொடர்ந்து மலையாளத்திலும் நடிக்கவிருக்கிறார். அங்கே 'ஜெய ஜெய ஜெய ஹே'வை இயக்கிய விபின் தாஸ் இயக்கத்தில் பகத் பாசில் நடிக்கும் படத்தின் மூலம் மலையாளத்தில் அடியெடுத்து வைக்கிறார்.  இவை தவிர கமலின் 'இந்தியன் 3' படத்திலும் மெயின் வில்லனாக வரவிருக்கிறார். இந்தப் படம் அடுத்தாண்டு வெளியாகிறது. விக்னேஷ் சிவன் இயக்கத்திலும் ஒரு படத்தில் நடித்து வருகிறார்.

சமீபத்தில் விழா ஒன்றில் எஸ்.ஜே.சூர்யாவை சந்தித்த விஐபி ஒருவர், ''உங்க படங்கள் எல்லாம் தவறாமல் பார்க்கிறேன்.நடிப்பில் உங்களுக்கு சரியான தீனி அமைந்துவிட்டதா என்று தன் கேள்வியை கேட்டுள்ளார். அதற்கு எஸ்.ஜே.சூர்யா இதுவரை நீங்க பார்த்த படங்களில் எல்லாம் என் நடிப்பு டீசர் போலத்தான். மெயின் பிக்சரை இனி வரும் படங்களில் தான் பார்க்கப்போகிறீர்கள்'' என்றார் சிரித்துக் கொண்டே!.