• Muthu Kumar
• 23 Nov, 2024

இயக்குநர் நித்திலன் சுவாமிநாதன் இயக்கத்தில் நடிகர் விஜய் சேதுபதியின் 50வது திரைப்படமாக வெளிவந்தது மகாராஜா திரைப்படம்.ஒரு குப்பைத்தொட்டியை கருப்பொருளாக எடுத்துக்கொண்டு படத்தை கையாண்ட இயக்குநர் நித்திலன், விறுவிறுப்பு மேல் விறுவிறுப்பு கொடுத்து கிளைமேக்ஸில் ரசிகர்கள் எல்லோருடைய மனதையும் வென்றிருந்தார்.

இந்நிலையில் வசீகரிக்கும் ஒரு தமிழ்சினிமாவை, அது எடுத்துச்சொல்லும் ஒரு கலாச்சாரத்தை சீனாவில் இருக்கும் திரை ரசிகர்களுக்கும் விருந்தாக்கும் வகையில், மகாராஜா திரைப்படம் 40,000 சீனா திரைகளில் வெளியாகவிருக்கிறது. படத்தின் வெளியீட்டு உரிமையை வைத்திருக்கும் ஹோம் ஸ்கிரீன் என்டர்டெயின்மென்ட் மற்றும் நைன் நாட்ஸ் என்டர்டெயின்மென்ட் ஆகியவை யி ஷி பிலிம்ஸ் (Yi Shi Films ) மற்றும் அலிபாபா பிக்சர்ஸ் உடன் இணைந்து இந்த வெளியீட்டை உறுதிப்படுத்தியுள்ளது.

இதன்படி நவம்பர் 29, 2024 அன்று சீனாவில் 40,000 திரைகளில் படத்தை வெளியிட Yi Shi Films திட்டமிட்டுள்ளது.

சீனாவில் வெளியான இந்திய சினிமாக்கள் மற்றும் அதன் திரை எண்ணிக்கையை ஒப்பிடுகையில், விஜய சேதுபதியின் மகாராஜா திரைப்படம் இரண்டாவது அதிகப்படியான திரைகளை கொண்டுள்ளது.சீனாவில் வெளியான இந்திய சினிமாக்களில், ரஜினியின் 2.O திரைப்படம் 48,000 திரைகளை கொண்டிருந்த நிலையில், இரண்டாவது அதிகபட்சமாக 40,000 திரைகளில் மகாராஜா வெளியாகவிருக்கிறது. அடுத்தடுத்த இடத்தில் பாகுபலி 2 (18,000 திரைகள்), தங்கல் (9000 திரைகள்) போன்ற திரைப்படங்கள் இருக்கின்றன.