காஞ்சிபுரத்தில் மக்களை சந்திக்கிறார் விஜய் - 2,000 பேருக்கு மட்டுமே அனுமதி!
- Muthu Kumar
- 23 Nov, 2025
திமுக அரசுக்கும் தவெகவுக்கும் தான் 2026 ஆம் ஆண்டு தேர்தலில் போட்டி என்கிற பிம்பத்தை விஜய் கனகச்சிதமாக கொண்டு வந்து விட்டார்.எடப்பாடி, சீமான், பாஜக நயினார் நாகேந்திரன் பேச்சை விட, விஜய்யின் ஒவ்வொரு அசைவும் கண்காணிக்கப்படுகிறது. இன்று விஜய் என்ன பேசப் போகிறார் என்கிற எதிர்பார்ப்பு தமிழகத்தைத் தாண்டியும் எழுந்துள்ளது.
இன்று காஞ்சிபுரம் மாவட்டத்தில் தனியார் கல்லூரி வளாகம் ஒன்றில் தமிழக வெற்றிக் கழகத்தின் தலைவர் விஜய், மக்களுடன் சந்திப்பு நிகழ்ச்சியை நடத்துகிறார். இந்த சந்திப்பில் 2,000 பேர் மட்டுமே அனுமதி அளிக்கப்பட்டுள்ளதாக தெரிவிக்கப்பட்டுள்ளது. கூட்டத்தில் கலந்து கொள்ளும் பொதுமக்கள் முன்னதாகவே தேர்வு செய்யப்பட்டுள்ள நிலையில், QR குறியீட்டுடன் கூடிய ஒரு நுழைவுச் சீட்டும் வழங்கப்பட்டுள்ளது.
காஞ்சீபுரம் மக்களின் வேண்டுகோளுக்காக இந்த சிறப்பு மக்கள் சந்திப்பு நடத்த இருப்பதாக த.வெ.க. சார்பில் தெரிவிக்கப்பட்டு உள்ளது. இந்த மக்கள் சந்திப்புக்குரிய பாதுகாப்பு ஏற்பாடுகளை தொண்டர் படையினருடன், மக்கள் பாதுகாப்பு படையினர் செய்து வருகின்றனர். இதற்காக கல்லூரி வளாக உள் அரங்கத்தில் போதுமான அளவு இருக்கைகளும், தடுப்பு வேலிகளும் அமைக்கப்பட்டு வருவதாக தெரிவிக்கப்பட்டுள்ளது. கூட்ட நெரிசல் எதுவும் இல்லாமல் நிகழ்ச்சி நடத்தப்பட இருப்பதாக த.வெ.க. அறிக்கையில் தெரிவித்துள்ளது.
இதுதொடர்பாக அக்கட்சியின் பொதுச்செயலாளர் புஸ்சி ஆனந்த் தனது எக்ஸ் வலைதளத்தில், மக்கள் விரும்பும் முதல்-அமைச்சர் வேட்பாளர், தமிழக வெற்றிக் கழகத் தலைவர் அவர்கள் கலந்து கொள்ளும் உள்ளரங்கு மக்கள் சந்திப்பு நிகழ்ச்சி 23ம் தேதி ஞாயிற்றுக்கிழமை, காஞ்சிபுரம் மாவட்டத்தில் உள்ள ஜேப்பியார் தொழில்நுட்பக் கல்லூரி வளாகத்தில், காலை 11.00 மணிக்கு நடைபெற உள்ளது. இந்த நிகழ்ச்சியானது முழுக்க முழுக்க உள்ளரங்கு சந்திப்பு நிகழ்ச்சியாக ஏற்பாடு செய்யப்பட்டுள்ளது.
காஞ்சிபுரம் மாவட்டத்தைச் சேர்ந்த, QR குறியீட்டுடன் கூடிய நுழைவுச் சீட்டு அளிக்கப்பட்டுள்ள 2 ஆயிரம் பேர் மட்டுமே இந்த உள்ளரங்கு நிகழ்ச்சியில் கலந்துகொள்ள அனுமதிக்கப்படுவார்கள். வேறு யாருக்கும் கண்டிப்பாக அனுமதி கிடையாது. கழகத் தோழர்களும் பொதுமக்களும் இதற்கு முழு ஒத்துழைப்பு தருமாறு அன்புடன் கேட்டுக்கொள்கிறேன்" என்று தெரிவிக்கப்பட்டுள்ளது.
Leave a Reply
Your email address will not be published. Required fields are marked *
தேடல்
செய்தி வகை
