மங்கோலியாவில் ஆசிய கோப்பையை வென்று பிடே மாஸ்டர் பட்டம் பெற்ற ஜெனிவன் ஜென்கேஸ்வரன்

Tamil Malar (Reporter)
05 Nov, 2025

செய்தி-வெற்றி மைந்தன்

மலேசியாவின் 16 வயது செஸ் மேதை ஜெனிவன் ஜென்கேஸ்வரன், மங்கோலியாவின் உலான்பாட்டரில் நடந்த 19ஆவது ஆசிய ஸ்கூல் செஸ் சாம்பியன்ஷிப் 2025-ல் 17 வயதுக்குட்பட்ட பொது பிரிவில் தங்கம் வென்று, பிடே மாஸ்டர் பட்டத்தை அசத்தலாகத் தட்டிச் சென்றார். இந்த வெற்றி, உலக செஸ் அரங்கில் மலேசியாவின் புதிய நட்சத்திரத்தை உருவாக்கியுள்ளது. 16 நாடுகளைச் சேர்ந்த 200-க்கும் மேற்பட்ட இளம் வீரர்கள் மோதிய இந்த மாபெரும் போட்டியில், ஜெனிவன் 9 சுற்றுகளில் அபாரமாக ஆடி, தங்கப் பதக்கத்தை கைப்பற்றி, ரசிகர்களை உற்சாகத்தில் ஆழ்த்தினார்.

மலேசியாவின் செஸ் மாஸ்டர் ஜர்னி அகாடமியில், தனது தந்தை ஜென்கேஸ்வரன் முனியன் (முன்னாள் சீ விளையாட்டு வெண்கல வீரர்) வழிகாட்டலில் பயிற்சி பெற்ற ஜெனிவன், ஆஸ்திரேலியா, சீனா, இந்தியா, ரஷ்யா, கோரியா, சிங்கப்பூர் வீரர்களை வீழ்த்தி முதலிடத்தைப் பிடித்தார். இந்த சாதனையால், பிடே விதிகளின்படி 17 வயதுக்குட்பட்ட தங்கப் பதக்க வெற்றியாளர்களுக்கு வழங்கப்படும் பிடே மாஸ்டர் பட்டத்தை அவர் பெற்றார். இதனால், அவரது பிடே ரேட்டிங் 1901-ஆக உயர்ந்து, உலக அளவில் 2036வது இடத்தைப் பிடித்து, செஸ் உலகில் புயலாக உருவெடுத்துள்ளார்!

அகாடமி மேனேஜர் செல்வி சண்முகம், ஜெனிவனின் இந்த வெற்றி, அவரது கனவுகளுக்கு ஊக்கமளிக்கும். அவர் செஸ் மேதையாக மட்டுமல்ல, சமூகத்தின் உதாரண நபராகவும் உயர வேண்டும என்று உற்சாகமாகக் கூறினார். செல்வி, ஜெனிவனின் அமைதியான மனநிலையையும், அர்ப்பணிப்பையும் வெகுவாகப் பாராட்டினார். இந்த வெற்றி, மலேசியாவின் இளம் செஸ் திறமைகளின் உலகளாவிய உயர்வை வெளிச்சமிட்டுள்ளது.

ஜெனிவன் இப்போது இன்டர்நேஷனல் மாஸ்டர் பட்டத்தை நோக்கி பயணிக்கிறார். இந்தியாவின் கோவாவில் நடைபெறும் உலகக் கோப்பையில் குகேஷ் போன்ற வீரர்களுடன் இணைந்து, ஆசிய செஸ் உலகில் மலேசியாவின் ஆதிக்கத்தை ஜெனிவன் வலுப்படுத்துகிறார். சமூக வலைதளங்களில் வைரலாகி, ரசிகர்களின் உற்சாகத்தைத் தூண்டிய இந்த இளம் மேதையின் எதிர்கால சாதனைகள், மலேசியாவை பெருமைப்படுத்தும் என எதிர்பார்க்கப்படுகிறது.

Your email address will not be published. Required fields are marked *

முக்கிய செய்தி