• Muthu Kumar
• 18 Oct, 2024

(எஸ்.எஸ்.மணிமாறன்)

கோல சிலாங்கூர், அக்.18

கோல சிலாங்கூர் இளைஞர்கள் கால் பந்தாட்டத் துறையில் வெற்றி வாகை சூடி பிறந்த மண்ணுக்குப் பெருமை தேடித்தர வேண்டும் என்று புக்கிட் மெலாவத்தி சட்டமன்றத் தொகுதி ஒருங்கிணைப்பாளர் தீபன் சுப்ரமணியம் வேண்டுகோள் விடுத்தார். கால்பந்தாட்டத்தில் களம் இறங்கியுள்ள வட்டார இந்திய இளைஞர்கள் இந்தத் துறையில் கால் பதித்து வெற்றி பெற வேண்டும் என்று அவர்களை வாழ்த்தினார்.

அண்மையில், கோல சிலாங்கூர் நகராண்மைக் கழகத்தின் ஏற்பாட்டில் நடைபெற்ற புட்சால் பெர்பாடுவான் நட்பு முறையிலான கால் பந்தாட்டத்தைத் தொடக்கி வைத்து உரையாற்றிய தீபன் சுப்ரமணியம் மேற்கண்ட கருத்தை வெளியிட்டார். அரசு சாரா அமைப்பின் தலைவர் விக்னேஸ்வர் கிருஷ்ண மூர்த்தியின் கட்டுக்கோப்பான நடவடிக்கைகள் காரணமாக இளைஞர்கள் பலரும் கால்பந்தாட்டத்தில் ஆர்வத்துடன் பங்கேற்றனர்.

இந்த நிகழ்ச்சியில் கலந்து கொண்ட கோல சிலாங்கூர் - நாடாளுமன்ற அலுவலகத்தின் பிரதிநிதி - செகு சுல்கிப்ளி, கிராமத் தலைவர் சியாங், அழைக்கப்பட்ட பிரமுகர்களுக்கு நிகழ்ச்சி ஒருங்கிணைப்பாளர் நகராண்மைக் கழக உறுப்பினர் நந்தகுமாரி சிங்காரம் மற்றும் அருள் செல்வி நாதன் நினைவுப் பரிசுகள் எடுத்து வழங்கி அவர்களை வரவேற்றனர்.

கோல சிலாங்கூர் நகராண்மைக் கழகத்தின் புட்சால் பெர்பாடுவான் நட்பு முறையிலான கால் பந்தாட்டம்!

Kola Selangor City Development Corporation's Putsal Perpaduan friendly soccer match!