PKR இடைநீக்கத்தைத் தொடர்ந்து பெட்டாலிங் ஜெயா எம்.பி. பதவியை ராஜினாமா செய்தார் லீ சியான் சுங்
- Surendran Sumdraraj
- 02 Oct, 2026
கோலாலம்பூர், அக் 2:
PKR கட்சியிலிருந்து மூன்று ஆண்டுகள் இடைநீக்கம் செய்யப்பட்டதைத் தொடர்ந்து, பெட்டாலிங் ஜெயா நாடாளுமன்ற உறுப்பினர் பதவியிலிருந்து விலகுவதாக லீ சியான் சுங் (Lee Chean Chung) அறிவித்துள்ளார்.
இன்று நடைபெற்ற செய்தியாளர் சந்திப்பில் பேசிய லீ, தனது PKR கட்சி உறுப்பினர் தகுதி மூன்று ஆண்டுகளுக்கு இடைநீக்கம் செய்யப்பட்டதாக செப்டம்பர் 30 அன்று தனக்குத் தெரிவிக்கப்பட்டதாகக் கூறினார்.
நாடாளுமன்ற உறுப்பினராக ஊதியம் பெற்றுக்கொண்டு அமைதியாக அமர்ந்திருக்க விருப்பம் இல்லை. எனவே, பெட்டாலிங் ஜெயா நாடாளுமன்ற உறுப்பினர் பதவியிலிருந்து நிபந்தனையின்றி இன்று முதல் விலக முடிவு செய்துள்ளேன் என்று முதல் முறையாக நாடாளுமன்ற உறுப்பினராகத் தேர்ந்தெடுக்கப்பட்ட அவர் கூறினார்.
முன்னாள் PKR தகவல் தொடர்பு இயக்குநரான லீ, திங்கட்கிழமையன்று கட்சியிலிருந்தும் விலகப்போவதாகத் தெரிவித்தார்.
தனது ராஜினாமாவுக்குப் பிறகும் பெட்டாலிங் ஜெயா சேவை மையம் தொடர்ந்து செயல்படும் என்றும், அந்தத் தொகுதியின் ஒரு குடியிருப்பாளராகத் தொடர்ந்து சமூகத்திற்குச் சேவை செய்வேன் என்றும் லீ கூறினார்.
அடுத்த பொதுத் தேர்தலில் போட்டியிடுவீர்களா என்று கேட்கப்பட்டபோது, அவ்வாறு செய்யத் திட்டமிட்டுள்ளதாகவும், பெட்டாலிங் ஜெயாவிலேயே தொடர்ந்து இருக்க விரும்புவதாகவும் லீ தெரிவித்தார்.
லீ 2022 பொதுத் தேர்தலில் பெட்டாலிங் ஜெயா நாடாளுமன்ற உறுப்பினராகத் தேர்ந்தெடுக்கப்பட்டார்!
Leave a Reply
Your email address will not be published. Required fields are marked *
தேடல்
செய்தி வகை
