பாலெக்பாங் சிறுமி வழக்கு; தவறான தகவல்கள் பாதிக்கப்பட்டவருக்கு மன உளைச்சலை ஏற்படுத்தும் – மும்தாஸ்
- Surendran Sumdraraj
- 29 Jun, 2026
கோலாலம்பூர், ஜூன் 29 – கிளாந்தான் மாநிலம் தும்பாட் அருகே உள்ள பாலெக்பாங் பகுதியில் புதருக்குள் கண்டெடுக்கப்பட்ட சிறுமி தொடர்பான சம்பவம் குறித்து வெளியான தகவல்களை அரசாங்கம் உடனடியாக ஆய்வு செய்ய வேண்டும் என்று தும்பாட் நாடாளுமன்ற உறுப்பினர் டத்தோ மும்தாஸ் முகமது நாவி வலியுறுத்தியுள்ளார்.
மக்களவையில் பேசிய அவர், கடந்த ஜூன் 18-ஆம் தேதி சந்தேகநபரின் தாக்குதலில் இருந்து தப்பிய அந்த சிறுமி பாலியல் வன்கொடுமைக்கு ஆளாகவில்லை என்று பின்னர் தெரியவந்த போதிலும், ஆரம்பத்தில் வெளியான சில தகவல்கள் பாதிக்கப்பட்டவரின் கண்ணியத்தைப் பாதிக்கும் வகையில் இருந்ததாகக் குறிப்பிட்டார்.
இதுபோன்ற துல்லியமற்ற அல்லது பொறுப்பற்ற தகவல்கள் பாதிக்கப்பட்டவருக்கு அவமானத்தையும் கடுமையான மன உளைச்சலையும் ஏற்படுத்தும் என்றும், அது மனஅழுத்தம் மற்றும் மனச்சோர்வுக்கு வழிவகுக்கும் அபாயம் இருப்பதாகவும் அவர் எச்சரித்தார்.
மேலும், சம்பவம் குறித்து வெளியாகும் தவறான தகவல்கள் பாதிக்கப்பட்ட சிறுமியின் கல்வி மற்றும் எதிர்கால வாழ்க்கையிலும் எதிர்மறையான தாக்கத்தை ஏற்படுத்தக்கூடும் என்று அவர் தெரிவித்தார்.
எனவே, பாலியல் குற்றங்கள் அல்லது சிறார்களை உள்ளடக்கிய சம்பவங்கள் தொடர்பாக அதிகாரிகளும் ஊடகங்களும் மிகுந்த பொறுப்புடன் செயல்பட்டு, உறுதிப்படுத்தப்பட்ட தகவல்களை மட்டுமே வெளியிட வேண்டும் என்று மும்தாஸ் அரசாங்கத்தை கேட்டுக்கொண்டார்.
Leave a Reply
Your email address will not be published. Required fields are marked *
தேடல்
செய்தி வகை
