• Muthu Kumar
• 26 Oct, 2024

புத்ராஜெயா:

பிரிக்ஸ் அமைப்பின்  கூட்டாளி நாடாக மாறுவதற்கான பயணத்தில் எத்தியோப்பியாவின் முழுமையான மற்றும் தெளிவான ஆதரவை மலேசியா பாராட்டுகிறது என்று பிரதமர் டத்தோஸ்ரீ அன்வார் இப்ராகிம் தெரிவித்தார்.பிரிக்ஸ் அமைப்பில் உறுப்பினராக உள்ள எத்தியோப்பியா, உலக வர்த்தகத்தில் ஐந்தில் ஒரு பங்கைக் கொண்ட குழுவில் சேர மலேசியாவின் விண்ணப்பத்திற்கு ஒரு முக்கிய தூணாக உள்ளது என்று அன்வார் கூறினார்.

எத்தியோப்பிய பிரதமர் டாக்டர் அபி அஹ்மத் அலியுடன் இன்று ஸ்ரீ பெர்டானா வளாகத்தில் நடந்த கூட்டு செய்தியாளர் சந்திப்பின் போது, "அரசாங்கத்தின் சார்பாக, நமது ஆழ்ந்த பாராட்டுக்களைமீண்டும் தெரிவிக்க வேண்டும்" என்று அன்வார் கூறினார்.
மலேசியாவுக்கான அபியின் இரண்டு நாள்அரசுமுறை பயணத்தின் ஒரு பகுதியாக நடைபெற்ற இருதரப்பு சந்திப்பைத் தொடர்ந்து செய்தியாளர் சந்திப்பு நடைபெற்றது.

பிரிக்ஸ் அமைப்பின் 13 புதிய கூட்டாளர் நாடுகளில் ஒன்றாக மலேசியா வியாழன் அன்று அதிகாரப்பூர்வமாக அங்கீகரிக்கப்பட்டது.எத்தியோப்பியா பல ஆண்டுகளாக அபரிமிதமான வளர்ச்சியை அடைந்துள்ளது என்றும், ஆப்பிரிக்க கண்டத்தில் மலேசியாவிற்கு ஒரு முக்கிய பங்காளியாக மாறியுள்ளது என்றும் அன்வார் குறிப்பிட்டார்!