• Shan Siva
• 03 Sep, 2026

கோலாலம்பூர்,  செப் 3: அடுத்த ஆண்டு இறுதியில் நாடாளுமன்றம் தானாகவே கலைக்கப்படும் வரை காத்திருக்காமல், அடுத்த பொதுத் தேர்தலை (GE16) முன்கூட்டியே நடத்த வேண்டும் என பாரிசான் நேஷனல் (BN) மற்றும் அம்னோ கட்சிகள் பிரதமர் அன்வர் இப்ராஹிமை வலியுறுத்துவதாக நம்பப்படுகிறது.

 பிரதமர் தனது முழு ஐந்தாண்டு பதவிக்காலத்தையும் நிறைவு செய்ய முடிவு செய்தால், அதற்கும் அம்னோ தலைமையிலான கூட்டணி தயாராக உள்ளது என்றாலும், GE16 தேர்தலை முன்கூட்டியே நடத்துவது  சிறந்தது என்று BN தலைவர் அஹ்மத் ஜாஹிட் ஹமிடி கூறினார்.

கூட்டணி அரசியல் ரீதியாகத் தொடர்ந்து முக்கியத்துவம் வாய்ந்ததாக இருப்பதை உறுதிசெய்ய, மக்களின் கவலைகளைக் களைவதன் மூலம் அடுத்த நாடு தழுவிய தேர்தலுக்கு BN தன்னைத் தயார்படுத்திக் கொள்ள வேண்டும் என்று அம்னோ தலைவர் கூறியதாகத் தெரிவிக்கப்பட்டுள்ளது.

கூட்டரசு அரசாங்கத்தின் தற்போதைய பதவிக்காலம் டிசம்பர் 2027-இல் முடிவடைகிறது, அதன் பிறகு 60 நாட்களுக்குள் பொதுத் தேர்தல் நடத்தப்பட வேண்டும். இதன் பொருள், GE16 தேர்தல் அதிகபட்சமாக பிப்ரவரி 2028-இல் நடத்தப்படலாம் என்பதாகும்.

 அன்வாரின் ஒற்றுமை அரசாங்கத்தின் ஒரு முக்கிய அங்கமாக BN விளங்குகிறது. 2022 பொதுத் தேர்தலில் எந்தக் கட்சிக்கும் பெரும்பான்மை இல்லாத நாடாளுமன்றம் உருவான பிறகு, அது  GPS, GRS  மற்றும் பிற கூட்டணிகளுடன் இணைந்து பக்கத்தான் ஹரப்பான்  தலைவருக்கு ஆதரவளித்தது.

பாரிசான் நேஷனல், PH உடன் இணைந்து பணியாற்ற விரும்புகிறதா அல்லது PAS தலைமையிலான பெரிகாத்தான் நேஷனலுடன் இணைந்து பணியாற்ற விரும்புகிறதா என்று கேட்கப்பட்டபோது, ​​தனது கூட்டணி முதலில் நன்மை தீமைகளை சீர்தூக்கிப் பார்க்க வேண்டும் என்று ஜாஹிட் குறிப்பிட்டுள்ளார்.

அரசியல் சூழல் காரணமாக  ஜொகூர் மாநிலத் தேர்தலில்  தாங்கள்  தனித்துப் போட்டியிடத் தயாராக இருந்தோம். ஆனால் நெகிரி செம்பிலானில், ஒரு கூட்டணியை அமைப்பது அதிகப் பயனளிக்கும் என்று உணர்ந்தோம்.

பல்வேறு சாத்தியமான கூட்டணிகளின் நன்மை தீமைகளை  கருத்தில் கொள்ள வேண்டும். லாபத்தில் இருப்போமா அல்லது நஷ்டத்தில் இருப்போமா என்பதை அறிய, அரசியல் ரீதியான லாப நஷ்டக் கணக்கைப் பார்க்க விரும்புகிறோம். பேச்சுவார்த்தைகளைத் தீர்மானிப்பதில்  தாங்கள் கணக்கிடுவது அரசியல் ஆதாயங்களையே என்று அவர் கூறினார்.

இருப்பினும், அன்வாரின் அமைச்சரவையில் உள்ள துணைப் பிரதமர், பாஸ் கட்சியுடனான ஒத்துழைப்பைக் குறிப்பிட்டு, அம்னோவின் அடிமட்டத் தொண்டர்கள் மலாய் அரசியல் ஒற்றுமைக்காகப் பாடுபடுவதாகக் கூறினார்.

எனவே,  கூட்டணிகளை அமைப்பதில்  அதற்கு முன்னுரிமை அளிக்கிறோம். ஆனால், பெருகிவரும் சிக்கலான அரசியல் சூழலை எதிர்கொள்ளும்போது, ​​நமது தேசத்தின் பன்முகத்தன்மையே நமது அடித்தளமாக இருக்க வேண்டும் என்பதையும்  ஒப்புக்கொள்ள வேண்டும் என அவர் சுட்டிக்காட்டினார்!