• Muthu Kumar
• 17 Nov, 2024

கோலாலம்பூர், நவ. 17-

தமிழவேள் கோசா அறவாரியத்தின் ஏற்பாட்டில் 'எழிலோவியம்' நூல் வெளியீட்டு விழா வரும் 22ஆம் தேதி வெள்ளிக்கிழமை மாலை 5.30 மணியளவில் துன் சம்பந்தன் மாளிகையில் உள்ள டான்ஸ்ரீ சோமா அரங்கத்தில் நடைபெறவிருக்கிறது.

நாடு, இனம், மொழி, சமயம் இவற்றுக்கு அருந்தொண்டாற்றியவரும் தேசிய நிலநிதி கூட்டுறவு சங்க நிர்வாகத் தலைவர், கூட்டுறவுக் காவலர் டான்ஸ்ரீ கே.ஆர்.சோமசந்தரத்திற்கு எழிலோவியம் எனும் இந்த நூல் சமர்ப்பணம் செய்யப்படுகிறது. முன்னாள் துணையமைச்சரும் தமிழவேள் கோசா அறவாரியப் பொறுப்பாளருமான டான்ஸ்ரீ க.குமரன் இவ்வெளியீட்டு விழாவில் தலைமையுரை ஆற்றுவார்.

தமிழவேள் கோசா கல்வி அறவாரியத்தின் தலைவரும் காவல்துறையின் முன்னாள் ஆணையருமான டத்தோஸ்ரீ

ஆ.தெய்வீகன், மலாயாப் பல்கலைக்கழகத்தின் இந்திய ஆய்வியல் துறையின் முன்னாள் தலைவர் முனைவர் கிருஷ்ணன் மணியம் இருவரும் வாழ்த்துரை வழங்குவர்.தேசிய நிலநிதி கூட்டுறவு சங்கத்தின் தலைமை நிர்வாக இயக்குநர் டத்தோ பா.சகாதேவன் நூலை வெளியிடுவார்.

முதல் நூலை கூட்டுறவு சங்கத்தின் தலைமை பொது நிர்வாகி டத்தோ ரத்னராஜ் சோமசுந்தரம் பெறுவார். உப்சி பல்கலைக்கழகத்தின் விரிவுரையாளர் முனைவர் இளங்குமரன் சிவானந்தன் வரவேற்புரை வழங்குவதோடு, மலேசியத் தமிழ்ப்பள்ளிகளின் முன்னாள் தேசிய அமைப்பாளர் பாஸ்கரன் சுப்பிரமணியம் நன்றியுரை வழங்குவதோடு நிகழ்ச்சியை வழிநடத்துவார்.

எழிலோவியம் எனும் இந்த நூல் வருகை தருபவர்களுக்கு அன்பளிப்பாக வழங்கப்படும். கல்வி நிதிக்கு நன்கொடை வழங்க விரும்பும் அன்பர்கள் நிகழ்ச்சியில் வழங்கலாம்.

இந்நிகழ்ச்சியில் வாசகர்கள், எழுத்தாளர்கள், இலக்கிய ஆர்வலர்கள், பொதுமக்கள் திரளாக கலந்து கொள்ளுமாறு ஏற்பாட்டுக் குழுவினர் கேட்டுக் கொள்கின்றனர்.