மகாளய பட்சத்தில் எதற்காக தர்ப்பணம் கொடுக்க வேண்டும்? தர்ப்பணம் கொடுக்கும் முறை எப்படி உருவானது ?
- Surendran Sumdraraj
- 20 Oct, 2026
மகாளய பட்சம் என்பது இந்து சமயத்தில் முன்னோர்களை (பித்ருக்களை) நினைவுகூர்ந்து வழிபடுவதற்காகக் ஒதுக்கப்பட்ட 15 நாட்கள் (அரை மாதம்) கொண்ட சிறப்பு காலமாகும்.
ஒரு வருடத்தில் வரும் மிக முக்கியமான விரத காலமாக மகாளய பட்சம் கருதப்படுகிறது. முன்னோர்களை வழிபட்டு, அவர்களின் ஆசிகளை பெறுவதன் மூலம் நம்முடைய குடும்பத்தில் உள்ள அனைத்து பிரச்சனைகளும் தீருவதற்கு வழி கிடைக்கும் காலம் என்பதால் இதை தவற விடக் கூடாது என்பார்கள். இந்த 15 நாட்களும் நாம் கொடுக்கும் தர்ப்பணத்தை நேரடியாக நம்முடைய முன்னோர்களே ஏதாவது ஒரு ரூபத்தில் வந்த பெற்றுக் கொள்வதாக ஐதீகம்.
மகாளய பட்சம் காலத்தில் முன்னோர்கள் வருவதற்கும், இந்த காலத்தில் தர்ப்பணம் கொடுப்பது மிக முக்கியமாக சொல்லப்படுவதற்கும் வரலாற்றின் முக்கிய காரணம் ஒன்று உள்ளது. இதற்காக மகாபாரத கதை ஒன்றும் சொல்லப்படுகிறது.மகாளய பட்சத்தின் முக்கியத்துவத்தை சொல்வதற்காக இந்த காலத்தில் தர்ப்பணம் கொடுக்கும் முறை உருவானதற்கான கதையாக இது சொல்லப்படுகிறது.
மகாளய பட்சம் உருவான கதை :
மகாளய பட்சம் என்பது முன்னோர்களை வழிபட ஏற்ற காலம், முன்னோர்கள் பித்ருலோகத்தில் இருந்த பூலோகத்திற்கு நம்மை பார்க்க வரும் காலம் என அனைவருக்கும் தெரியும். ஆனால் இறந்து போன முன்னோர்கள் எதற்காக பூமிக்கு நம்மை காண வரவேண்டும்? மகாளய பட்சம் காலத்தில் தர்ப்பணம் கொடுக்கும் முறை எப்படி ஏற்பட்டது என்ற சந்தேகம் பலருக்கும் ஏற்படும். இந்த கேள்விக்கான விடையை தான் இங்கு பார்க்க உள்ளோம்.
மகாளய பட்ச காலத்திற்கான வரலாறும் மகாபாரதத்துடன் தொடர்புடையதாகவே சொல்லப்படுகிறது. தானம், தர்மம் என்றாலே நாம் உதாரணமாக சொல்லப்படுவது மகாபாரத கர்ணனை தான். அந்த அளவிற்கு கொடை வள்ளலாக வாழ்ந்தவர். தனது வாழ்நாள் முழுவதும் தன்னை தேடி வருபவர்களுக்கு இல்லை என்று சொல்லாமல் வாரி வாரி வழங்கியவன் கர்ணன். போர்களத்தில் அம்புகள் பாய்ந்து உயிர் பிரியும் நிலையில் இருந்த போதும் கூட அந்தணர் வேடத்தில் வந்து கண்ணன் கேட்டதும் இல்லை என்று சொல்லாமல் தான் செய்த புண்ணிய பலன்கள் அனைத்தையும் தானமாக அளித்தவன் கர்ணன்.
கர்ணனுக்கு சாப்பிட கிடைத்த தங்கம்
அப்படிப்பட்ட கர்ணன் இறந்த பிறகு, அவன் செய்த புண்ணியங்களின் பலனாக சொர்க்கத்திற்கு சென்றான். அங்கு கர்ணனுக்கு சாப்பிடுவதற்கு தங்கள், பொன், பொருள் என குவியல் குவியலாக கொடுக்கப்பட்டது. இதைக் கண்டு அதிர்ச்சி அடைந்த கர்ணன், இவற்றை எப்படி சாப்பிடுவது என புரியாமல் குழம்பி போனான். சொர்த்தின் அதிபதியான இந்திரனிடமே சென்று இது பற்றி விளக்கம் கேட்டான். அதற்கு விளக்கம் அளித்த இந்திரன், "கர்ணா, நீ வாழும் காலத்தில் அனைவருக்கும் பொன், பொருள் என வாரி வாரி வழங்கினாய். ஆனால் ஒருமுறை கூட முன்னோர்களுக்கு தர்ப்பணம் கொடுக்கவில்லை. அதன் விளைவு தான்" என்றான்.
இந்திரன் கர்ணனுக்கு கொடுத்த வாய்ப்பு :
இதைக் கேட்டு குழப்படைந்த கர்ணன், தன்னுடைய இந்த நிலை மாற என்ன செய்ய வேண்டும் என இந்திரனிடமே கேட்டான். அதற்கு இந்திரனோ, நீ செய்த புண்ணியத்தின் பலனாக நீ 15 நாட்கள் பூலோகத்திற்கு சென்று தங்கி, அங்கு உன்னுடைய முன்னோர்களுக்கு தர்ப்பணம் கொடுத்தால் உன்னுடைய இந்த நிலை மாறும் என வாய்ப்பு அளித்தார். ஆனால் தன்னுடைய முன்னோர்கள் யார் என்றே தனக்கு தெரியாத போது அவர்களுக்கு எவ்வாறு நான் தர்ப்பணம் கொடுக்க முடியும் என கேட்டான் கர்ணன்.
மகாளய தர்ப்பணம்
இதற்கு விளக்கம் அளித்த இந்திரன், உன்னுடைய முன்னோர்கள் யார், அவர்கள் பெயர் என்ன, அவர்கள் எப்போது இறந்தார்கள் என எந்த விபரமும் தெரியவில்லை என்றாலும் இந்த 15 நாட்கள் நீ கொடுக்கும் தர்ப்பணத்தை உன்னுடைய முன்னோர்கள் அனைவரும் கூட்டமாக வந்து ஏற்றுக் கொள்வார்கள். நீ வாழ்நாள் முழுவதும் தர்ப்பணம் கொடுக்காத குறை, இந்த 15 நாட்கள் கொடுப்பதால் நிவர்த்தியாகி விடும். அதன் பிறகு நீ செய்த புண்ணியங்களின் பலன்கள் அனைத்தும் உனக்கு முழுமையாக கிடைக்கும் என்றார்.
மகாளய பட்சத்தில் முன்னோர்கள் வர காரணம்:
இந்திரன் சொன்னபடியே பூமிக்கு வந்து 15 நாட்கள் இருந்த கர்ணன், தன்னுடைய முன்னோர்களுக்கு தர்ப்பணம் கொடுத்து வழிபட்டான். அதன் பிறகு அவனுடைய குறை நீங்கி, அவன் முக்தி அடைந்ததாக புராணங்கள் சொல்கின்றன. இதன் காரணமாகவே மகாளய பட்சத்தில் தங்களின் நிறைவேறாத ஆசைகள், கடமைகள் ஆகியவற்றை நிறைவேற்றுவதற்காகவும், தனது சந்ததிகளின் தர்ப்பணத்தை ஏற்றுக் கொள்வதற்காகவும், அதன் பலனால் நற்கதி அடைவதற்காகவும் முன்னோர்கள் பூமிக்கு வருவதாக சொல்லப்படுகிறது.
லட்சுமி சுப்பிரமணியம்
Leave a Reply
Your email address will not be published. Required fields are marked *
தேடல்
செய்தி வகை
