• Shan Siva
• 12 Oct, 2024

இராஜதந்திரம் மற்றும் பேச்சுவார்த்தை மூலம் தென் சீனக் கடலில் சர்ச்சைகளைத் தவிர்க்க ஆசியான் மற்றும் சீனா இடையே உடன்பாடு எட்டப்பட்டுள்ளதாக பிரதமர் டத்தோஸ்ரீ அன்வார் இப்ராகிம் தெரிவித்தார்.

ஆசியான் உச்சிமாநாட்டின் நிறைவில் மலேசிய ஊடகங்களுக்கு பேட்டியளித்த அவர் இதனைத் தெரிவித்தார்.

1982 ஆம் ஆண்டு ஐக்கிய நாடுகளின் கடல் சட்டம் தொடர்பான மாநாட்டின் கொள்கைக்கு ஏற்ப இந்த விவகாரம் அமைதியான முறையில் கையாளப்படும் வகையில் சீனப் பிரதமர் லீ கியாங்கின் உறுதிமொழி உள்ளது.

10 ஆசியான் உறுப்பினர்களும், பேச்சுவார்த்தை பங்காளியான சீனாவும், அந்தந்த தேசிய இறையாண்மையைப் பாதுகாக்கும் உரிமைக்கு முக்கியத்துவம் கொடுத்து உச்சிமாநாட்டில் விவாதிக்கப்பட்ட முக்கியப் பிரச்சினைகளில் தென் சீனக் கடலில் உள்ள சர்ச்சைகளும் அடங்கும் என்று அன்வார் விளக்கினார்.

கடந்த ஆகஸ்டில், தென் சீனக் கடலில் சபினா ஷோல் அருகே கடலோரக் காவல்படகுகள் மோதியதில் பிலிப்பைன்ஸும் சீனாவும் ஒருவரையொருவர் சுட்டிக்காட்டி, ஒரு மாதத்திற்குள் இரு நாடுகளுக்கும் இடையிலான ஐந்து மோதல்கள் நிகழ்ந்தன.

பல தீவுகள் மற்றும் திட்டுகள் உட்பட தென்சீனக் கடலின் பெரும்பகுதியை சீனா தனது பிராந்திய நீர்நிலைகளாக உரிமை கோரியது, இது பிலிப்பைன்ஸ் மற்றும் பல நாடுகளுடன் மோதல்களுக்கு வழிவகுத்தது.

மியான்மரில் அரசியல் நெருக்கடி மற்றும் வன்முறை ஆகியவை மூன்று நாள் உச்சிமாநாட்டில் விவாதிக்கப்படும் முக்கிய தலைப்புகளில் ஒன்றாகும் என்று அன்வார் கூறினார்.

மலேசியாவுடன் நேரடியாகவும் சுறுசுறுப்பாகவும் ஈடுபடத் தயாராக இருப்பதாக மியான்மர் தெரிவித்ததுடன், பேச்சுவார்த்தைகளை ஒருங்கிணைக்க வெளியுறவு அமைச்சர் முகமட் ஹசானுக்கு அவர் அறிவுறுத்தினார்.

பிப்ரவரி 2021 இல் மியான்மரின் சிவில் அரசாங்கம் திடீரென இராணுவப் புரட்சியில் கவிழ்க்கப்பட்டதில் இருந்து ஏறக்குறைய 4,000 பேர் கொல்லப்பட்டனர் மற்றும் கிட்டத்தட்ட ஒரு மில்லியன் குடியிருப்பாளர்கள் இடம்பெயர்ந்துள்ளனர். மலேசியா தற்போது சுமார் 200,000 மியான்மர் அகதிகளுக்கு  புகலிடம் கொடுத்துள்ளது.

மேலும், கிழக்கு ஆசிய உச்சி மாநாட்டில் ஆசியான் சுதந்திரக் கொள்கையை நிலைநிறுத்துவதன் முக்கியத்துவத்தை மலேசியாவும் வலியுறுத்தியதாக அன்வார் கூறினார்.

அமெரிக்கா மற்றும் ஐரோப்பிய யூனியனுடன்  இருதரப்பு உறவுகளைத் தொடர்வதும், சீனாவுடனான உறவுகளை வலுப்படுத்துவதும் இதில் அடங்கும் என்றார்.

அதே நேரத்தில், நாங்கள் ரஷ்யாவுடன் உறவைப் பேணுகிறோம், அதை சில மேற்கத்திய நாடுகள் ஏற்கவில்லை, ஆனால் ஒரு சுதந்திரமான மற்றும் இறையாண்மை கொண்ட நாடாக, அனைவருடனும் உறவுகளை ஏற்படுத்த எங்களுக்கு உரிமை உள்ளது என்பதை தாம் வலியுறுத்தியதாக அன்வார் விளக்கினார்.

தென்கிழக்கு ஆசிய உச்சி மாநாட்டில் 10 ஆசியான் உறுப்பினர்களுடன்  ஆஸ்திரேலியா, சீனா, இந்தியா, ஜப்பான், நியூசிலாந்து, ரஷ்யா, தென் கொரியா மற்றும் அமெரிக்கா உட்பட 18 நாடுகள் பங்கேற்றன!