• Shan Siva
• 18 Nov, 2024

தீபத்தின் சுடரைச் சின்னமாகக் கொண்டு ஓம்ஸ் எனும் சாம்ராஜ்யத்தை நிறுவி, தனி மனிதராய் உழைத்து, முன்னேறி,  தன் உழைப்பின் வெகுமதியைச் சுயமாக அனுபவிக்காமல், தன் குடும்பம் தன் உறவு என்று இல்லாமல், திரும்பிய  திசைகள் எங்கும் வாரி வழங்கி தன் சேவையால் ஒளிரும் மாமனிதர் ஓம்ஸ் தியாகராஜன் அவர்களின் 70-ஆவது பிறந்த நாள் விழா ‘ஓம்ஸ் எனும் அன்பின் சகாப்தம்’ எனும் பெருவிழாவாக, ஷா ஆலம், டபுள் ட்ரீஹோட்டலில் சனிக்கிழமை வெகு சிறப்பாக நடைபெற்றது.

மலேசிய அரிமா சங்கத்தின் தோற்றுநரும், ஓம்ஸ் அறவாரியம் மற்றும் ‘தமிழ் மலர்’ குழுமத் தலைவருமான ஓம்ஸ் தியாகராஜனின் இந்த பிறந்த நாள் கொண்டாட்டத்தில் பல முக்கிய பிரமுகர்கள், குடும்ப உறுப்பினர்கள், ஓம்ஸ் குழுமத்தினர் உட்பட ஊடகவியலாளர்களும் கலந்துகொண்டனர்.

ஒளிரும் தீபத்தை ஊதி அணைத்து, அனிச்சல் பகிரும் கலாச்சாரம் ஐயாவுக்கு உடன்பாடில்லை என்பதால், தமிழ் வாழ்த்து ஒலிக்க, அன்பின் ஒளியில் வெளிச்சமானது விழா.

நிகழ்வில் பிரதான அங்கமாக ‘தமிழ் மலர்’ ஊடகத்தின் புதிய அத்தியாயமாய் ‘தமிழ் மலர்’ செயலி மற்றும் ‘தமிழ் மலர்’ இணையதளம் அறிமுகப்படுத்தப்பட்டது. இதனை ஓம்ஸ் குழுமத்தின் நிர்வாகத் தலைவரும், ‘மலர் டிவி’யின் நிர்வாக இயக்குநருமாகிய டாக்டர் பழனீஸ்வரன் தியாகராஜன் அதிகாரப்பூர்வமாகத் தொடக்கி வைத்தார்.

செயலி குறித்த விளக்கத்தை அதன் வடிவமைப்பாளரும் மென்பொருள் பொறியியலாளருமான ஸ்ரீ மூர்த்தி வழங்கினார்.

எந்த இனமும் இதைச் செய்யவில்லை!

நிகழ்வில் பேசிய முன்னாள் சுகாதாரத்துறை துணை அமைச்சர் டான்ஸ்ரீ க.குமரன், டத்தோ கு,பத்பநாபனால் அறிமுகப்படுத்தப்பட்ட மாபெரும் சமுதாயச் சேவகர் ஓம்ஸ் தியாகராஜன் என்று குறிப்பிட்டார். வாழ்க்கையில் சிரமப்படுகிறவர்கள், இல்லாதவர்களுக்கு அன்பைச் செலுத்துவதில்தான் நாம் இறைவனைக் காண முடியும். அந்த அளவிற்கு ஏழை  எளியவர்கள் மட்டுமல்லாது எல்லா நிலையில் உள்ளவர்களுக்கும் உதவிகள் புரிந்து வருகிறார். மக்களின் துயரங்களைக் கேள்விப்படுகிற பொழுதெல்லாம் அதற்கு உதவி புரிகிற நல்ல மனம் கொண்டவராக ஓம்ஸ் திகழ்கிறார். ஏறக்குறைய 20 ஆண்டுகளாக ராஜன் அவர்களைத் தெரியும். நான் அறிந்த வகையில் பல்வேறு சேவைகளை அவர் வழங்கி வந்தாலும், கல்விக்காக அவர் ஆற்றும் சேவை அளப்பரியது. தனி ஒருவனாய் தமிழ்ப்பள்ளிகளுக்காக, தமிழ்க் கல்விக்காக இன்று நேற்று நாளையும் என வற்றாது  உதவிகளைச் செய்து வருகிறார். பணம் இருப்பவரிடம் மனம் இல்லை. மனம் இருப்பவரிடம் பணம் இல்லை. ஆனால், இந்த இரண்டும் வாய்க்கப்பெற்றவராக ஓம்ஸ் தியாகராஜன் இருக்கிறார். கல்வியின் முககியத்துவத்தைக் கருதி கல்விக்காக அதிக நல்லுதவிகளை வழங்கி வரும் ஓம்ஸ், 10 ஆண்டுகளாக பல்கலைக்கழக மாணவர்களுக்கு தங்கப் பதக்கமும் வழங்கி கௌரவித்து வருகிறார். எந்த இனமும் பல்கலைக்கழகத்தில் அத்தகைய உதவியைச் செய்யவில்லை. செல்வ வளங்கள் குவிந்து கிடக்கின்றன. அதைத் தானும் தன் குடும்பமும் மட்டும் அனுபவிக்காது தன் சமுதாயம், தன் மக்களுக்கும் கொடுக்க வேண்டும் என்ற நல்லெண்ணத்தில் தன் செல்வங்களை வழங்கி வருகிறார். அவர் வாழ்வாங்கு வாழவேண்டும்” என்று கூறினார்.

நான் செய்த தவறு!

நிகழ்வில் பேசிய ஓம்ஸ் பா.தியாகராஜன், “ஒவ்வொரு பிறந்தநாளுக்கும் வாழ்த்துகளைக் கூறுவதற்குப் பல நல்ல உள்ளங்கள் வருவார்கள். அவர்களின் முதல் இடத்தைப் பிடிப்பவர் டான்ஸ்ரீ குமரன் அவர்கள் என்று கூறினார். மேலும், இதற்குமுன் சரஸ்வதி கந்தசாமியாக வந்தவர் இப்போது, செனட்டர் மற்றும் துணை அமைச்சராக வந்திருக்கிறார். அவருக்குப் பாராட்டுகள், அவருக்கு நியமனம் வழங்கிய பிரதமருக்கு நன்றியைத் தெரிவித்துக்கொள்கிறேன் என்றார். மறு பிறவி என்று ஒன்று இருந்தால், டான்ஸ்ரீ குமரன் அரசியல்வாதியாகப் பிறக்காமல், தமிழ்ப்பள்ளி ஆசிரியராகப் பிறக்க வேண்டும் என்று அவர் வர்ணித்தார்.

மேலும், இதுவரை  25,315 நாள் இந்த மண்ணில் பிறந்த நான் காலடி எடுத்து வைத்துள்ளேன். 70 ஆண்டுகள், 70 தீபாவளிகளைப் பார்த்துவிட்டதாக அவர் கூறினார். கடந்த மே மாதம் ஐந்தாம் தேதி கொண்டாட வேண்டிய எனது பிறந்தநாளை இப்போது கொண்டாடுவதற்கு காரணம் பல நல்ல உள்ளங்களின் செயல்களால் அது தள்ளிவைக்கப்பட்டதுதான். நமது பிரதமர் அன்வார் என்னுடைய ஒவ்வொரு பிறந்தநாளிலும் கலந்துகொள்வார். தற்போது பிரதமராகிவிட்டார் அவர் வெளிநாட்டில் இருக்கிறார். இருப்பினும் அரசியல்வாதிகளை அழைக்க வேண்டாம். அவர்களுக்கு வேலை இருக்கிறது, அதை விட்டுவிட்டு பிறந்தநாளுக்கு வருவதில் அர்த்தமில்லை” என்று தாம் கூறியதாக ஓம்ஸ் பா.தியாகராஜன் தெரிவித்தார்.

“அன்வார் பிரதமராகப் பதவியேற்ற பிறகு இந்திய சமுதாயத்திற்கான பிரச்னைகள் தீர்ந்துவிட்டதா என்று கேட்டால், அது ஒரு கேள்விக்குறிதான். அன்வார் பிரதமராக வந்த காலகட்டத்தில்  கூட்டணி ஆட்சி என்பதால் தனித்துச் செயல்பட முடியாத ஒரு சூழ்நிலை. இருந்தாலும் அதை ஒரு சாக்குபோக்காகச் சொல்லிக்கொண்டு இருக்க முடியாது.  எல்லாரையும் போல் அன்வார் பிரதமராக நானும் ஆசைப்பட்டேன். அவர் ஆகிவிட்டார். ஆனால், நான் செய்த ஒரே ஒரு தவறு  கடந்த காலங்களில் முன்னாள் பிரதமர் நஜிப்பிற்கு ரவீன் பொன்னையா எப்படி இந்தியர்களுக்கான அதிகாரியாக, இந்தியர்களுக்கான பிரச்னைகளை எடுத்துச் சொல்லும் நபராக இருந்தாரோ, அதேபோல் டத்தோஸ்ரீ அன்வாருக்கும் ஒருவர் இருக்க வேண்டும் என்பதை எடுத்து வழங்கவில்லை. அதற்கும் கூடிய விரைவில் நல்ல வழியைக் கண்டுபிடிப்பார் என்று நம்புகிறேன்.

எனது முதல் பிறந்தநாளை 50 வது வயதில் கொண்டாடினேன். எப்போதும் தொண்டர்கள்தான் தலைவருக்குப் பிறந்தநாள் விழா செய்வார்கள், ஆனால், ஒரு மாமனிதர்,  சிறந்த தலைவர், துணை அமைச்சர் தன் சகாக்களோடு சேர்ந்து ஓம்ஸ் பா.தியாகராஜனின் பிறந்தநாளைக் கொண்டாடினார். அவர்தான் டத்தோ கு.பத்மநாபன். அவர்தான் எனது பிறந்தநாளை சமுதாயத்தின் மத்தியில் கொண்டாட வேண்டும் என அந்த விழாவை நடத்தினார். இன்று அவர் இல்லை அவரது புதல்வர் வந்திருக்கிறார். அடுத்து 51 வது பிறந்தநாளில் பிரதமர்துறை அமைச்சர் டத்தோஸ்ரீ நஸ்ரி கலந்துகொண்டார். அந்த 51-வது பிறந்த நாளில்தான் டத்தோஸ்ரீ நஸ்ரி அவர்கள் ஓம்ஸ் அறவாரியத்தைத் தொடக்கி வைத்தார்கள். அதன்பிறகு அடுத்தடுத்து சில தலைவர்கள் கலந்துகொண்டார்கள். பின்னர் கடந்து மூன்று ஆண்டுகளாக டத்தோஸ்ரீ அன்வார் இப்ராஹிம் கலந்துகொண்டார்.

எனக்கு 70 வயது.எப்போதும் எனது வயதை நான் சொல்வதில் தயங்கியதில்லை. வயது முக்கியமல்ல. நாம் வாழ்ந்த காலத்தில் என்ன செய்தோம் என்பது முக்கியம். அந்த வகையில் என்னால் இயன்றதை, சிறு சிறு சேவைகளைச் செய்திருக்கிறேன் என்று நம்புகிறேன். எனக்குப் பிறகு, எனது குழந்தைகள் எனது நிர்வாகத்தைச் சேர்ந்தவர்கள் இதை வழிநடத்துவார்கள் என்று நம்புகிறேன்” என்று ஓம்ஸ் பா.தியாகராஜன் தெரிவித்தார்!

பூஜ்யத்தில் ராஜியம்!

ஒற்றுமைத் துறை துணையமைச்சர் சரஸ்வதி கந்தசாமி பேசுகையில் “பூஜ்யத்தில் இருந்துகொண்டு ராஜியத்தை ஆண்டுகொண்டிருப்பான் ஒருவன், அவனைப் புரிந்துகொண்டால் அவன்தான் இறைவன்’ என்ற பாடலுக்கேற்ப, இந்த நிகழ்வின் அழைப்பிதழ் வடிவமைப்பில் பூஜ்யத்திற்குள் ஓம்ஸ் தியாகராஜன் அவர்களின் முகம் இருப்பதுபொருத்தமாய் அமைந்திருக்கிறது” என்று வர்ணித்தார்.

ஓம்ஸ் தியாகராஜன் அவர்களின் நெருங்கிய நண்பரான டத்தோஸ்ரீ அன்வார், இதற்கு முன் நடைபெற்ற பிறந்தநாள்களில் கலந்துகொண்டுள்ளார். ஆனால், தற்போது அவர் வெளிநாட்டில் இருப்பதால், பிரதமர் டத்தோஸ்ரீ அன்வார் இப்ராஹிம் சார்பாக நான் வாழ்த்துகளைக் கொண்டுவந்துள்ளேன். இன்று  அவர் கலந்துகொள்ளவில்லை என்றாலும் அன்வாரின் மனதில் மிகச்சிறப்பான இடத்தைப் பிடித்திருப்பவர் ஐயா ஓம்ஸ் தியாகராஜன் அவர்கள். நாட்டுப் பிரதமரே போற்றக்கூடிய ஒரு மனிதராக இங்கே புகழப்படுவதற்குக் காரணம், அவர் தன்னுடைய பயணத்தைச் செதுக்கிக்கொண்ட விதம்.

தனது பிறந்த நாள் முதல் முதலாகக் கொண்டாடப்பட்டபோது, அந்நிகழ்வை டத்தோ கு.பத்மநாபன் நடத்தியதாக ஓம்ஸ் தியாகராஜன் ஐயா அவர்கள் கூறினார். அண்மையில் பேராக்கில் நடைபெற்ற முன்னாள் பிரதமர் துன் ரசாக் பற்றிய புத்தக வெளியீட்டில் பேராக் சுல்தான் தனது உரையின் போது பேசுகையில், துன் ரசாக் அரசியலுக்கு அப்பாற்பட்டு, நல்ல தலைவர்களை அடையாளம் கண்டு, அவர்களை அரசியலுக்கு அழைத்து வந்தார். அதில் ஒருவர் டத்தோ கு.பத்மநாபன் என்று பேராக் சுல்தான் பேசினார். பிரதமரால் அடையாளம் காணப்பட்ட அப்படிப்பட்ட சிறந்த தலைவர் கு.பத்மநாபன் என்றால், அந்த பத்மநாபனால் அடையாளம் காணப்பட்ட சிறந்த சமுதாயத் தலைவராக ஐயா ஓம்ஸ் பா.தியாகராஜன் திகழ்கிறார் என்று சரஸ்வதி கந்தசாமி புகழாரம் சூட்டினார். சிறந்த மனிதர்களின் கண்ணில் சிறந்தவையே தெரியும் என்கிற சிந்தனையின் அடிப்படையில், ஒரு சிறந்த தலைவர் ஒரு சிறந்த சமூகத் தலைவரை அடையாளம் கண்டுள்ளார்.

கடந்த காலங்களில் ஒரு சாதாரண சரஸ்வதி கந்தசாமியாக கலந்துகொண்டுள்ளேன். இன்று நான் ஒரு செனட்டராகவோ, துணையமைச்சராகவோ இல்லாமல் அதே சரஸ்வதி கந்தசாமியாகத்தான் இந்நிகழ்விற்கு வந்துள்ளேன். ஓம்ஸ் தியாகராஜன் அவர்களின் சவால் மிக்க பயணத்தில் ஒரு வழக்கறிஞராக, தமிழ் மலரின் சட்ட ஆலோசகராக  நானும் இணைந்தேன். எப்படி தமிழ் மலர் ஐயாவுக்கு நெருக்கமான ஊடகமாக இருக்கிறதோ, அதேபோல் பினாங்கில் முதன் முதலாகத் தோன்றிய தமிழ் மலர் எனக்கும் மனதுக்கு நெருக்கமாக உள்ளது. தற்போது அதற்குண்டான செயலியை அறிமுகப்படுத்தியபோது பெரும் மகிழ்ச்சியையும், பெருமிதத்தையும், மன நிறைவையும் ஏற்படுத்தியது. இந்தச் செயலியின் வாயிலாக தமிழ் மலர் அதிகமான மக்களைச் சென்றடையும் என்றால், அது ஐயா ஓம்ஸ் தியாகராஜன் அவர்களின் வழி, தமிழ் வழி மக்களுக்கு சிந்தனை மாற்றத்தை ஏற்படுத்துகிறது.

அவரது சமுதாயச் சேவைகளில் ஓம்ஸ் அறவாரியத்தின் பங்கு அளப்பரியது. அரசாங்கம் செய்ய முடியாத, செய்யத் தயங்கிய, செய்யத் தவறிய பல சாதனைகளை  ஓம்ஸ் அறவாரியம் செய்திருக்கிறது. தமிழ்ப்பள்ளி மாணவர்களில் சாதனைப் படைத்தவர்களுக்கு, அவர்களுக்கு மகுடம் சூட்டும் வகையில்  தங்கப் பதக்கம் வழங்கி அவர்களை  ஊக்குவித்து வருகிறது. இப்படிப் பல வகையிலே நம் சமுதாயத்திற்கு தனது சம்பத்தியத்தைச் செலவழித்துக்கொண்டிருக்கிற ஒரு மகான் ஐயா ஓம்ஸ் தியாகராஜன் அவர்கள் என்று சரஸ்வதி கந்தசாமி கூறினார். மேலும் இந்திய சமுதாயத்திற்கு அரசு செய்ய வேண்டியதைச் சுட்டிக்காட்டியிருக்கும் ஐயா ஓம்ஸ் தியாகராஜன் அவர்களின் எண்ணம் ஈடேற தாங்கள் படுபடுவோம் என்றும் தெரிவித்தார். பிரதமர் டத்தோஸ்ரீ அன்வார் இப்ராஹிம் இந்தியர்களுக்காக பல முயற்சிகளை எடுத்து வருகிறார். அது முறையாக மக்களிடம்  உரிய நேரத்தி சென்று சேரும் என அவர் கூறினார். பத்திரிகை இல்லை என்றால் ஆட்சி மாற்றத்திற்கான அடித்தளம் அமைந்திருக்காது. அதேபோல்  அதேபோல் இந்தியர்களின் வாக்குகளை பெரும்பான்மையாகப் பெற்று அன்வார் பிரதமராக வெற்றிபெற்றதற்குப் பின்புலத்தில் பெரும் பங்காற்றி, பெரும் தியாகம் செய்தவர் ஓம்ஸ் தியாகராஜன் அவர்கள். எனவே இந்திய சமுதாயத்திற்கான ஓம்ஸ் தியாகராஜன் அவர்களின் எதிர்பார்ப்பு நிச்சயம் வீண்போகாது. அதை நிச்சயம் பிரதமர் நிறைவேற்றுவார். ஓம்ஸ் தியாகராஜன் அவர்களின் கனவில் எனது பங்கும் இருக்கும். அவர் நீடூழி வாழ வேண்டும்” என துணை அமைச்சர் தெரிவித்தார்.

அப்பாவின் பாதையில்...

தனது தந்தை குறித்து டாக்டர் பழனீஸ்வரன் பேசுகையில், “ இந்த 70 ஆண்டு காலமாக என் தந்தையுடன் பயணித்த அனைத்து உறவுகளுக்கும், ஓம்ஸ் அறவாரியத்திற்கு ஆதரவாக இருந்த நல்ல உள்ளங்களுக்கும் நன்றி.

தன் சுய உழைப்பின் வெகுமதியால் ஓம்ஸ் அறவாரியத்தை தோற்றுவித்து,  கடந்த 15 ஆண்டுகளாக கல்வி, சமயம், கலை கலாச்சாரம், பண்பாடு  என  சமுதாயச் சேவைகளில் ஓம்ஸ் அறவாரியம் தொடர்ந்து  ஈடுபட்டு வருகிறது.

கல்வி ஒன்றே சமுதாயத்தின் வெளிச்சம் என்பதால், இந்த நிகழ்வில்கூட தமிழ்ப்பள்ளிகளைச் சேர்ந்த 350 ஆசிரியர்களை அழைத்து அவர்களுக்கு அங்கீகாரம் வழங்குகிறோம். இனி வரும் காலங்களிலும் கல்விக்கு மேலும் முக்கியத்துவம் அளிப்போம்.

கடந்த நாற்பது வருடங்களாக, நான் அப்பாவுடன் இருந்து பார்த்து வியந்த குணம் அவரது எளிமையும், சமுதாயத்தின் மீதான அவரது அக்கறையும், அன்பும்தான்.

பெயர், புகழ், பதவிகளை எல்லாம் பெரிதாய் நினைக்காதவர். அவற்றைத் தேடிப் போகக்கூடாது என்பதே இதுவரைக்கும் அவரது கொள்கையாக இருக்கிறது.

இன்றைய சமூக ஊடகக் காலக்கட்டத்தில் சிறிய உதவிகள் கூட பெரிதாய் விளம்பரப்படுத்தப்படும் சூழலில், தான் செய்த எண்ணற்ற உதவிகள் எதையும் அவர் விளம்பரப்படுத்தியதில்லை..

“எனது இந்த சேவை இறைவனுக்குத் தெரிந்தால் போதும்” என்பார்.பந்தா, ஆடம்பரம், பேராசை எல்லாம் துளியும் அவரிடம் பார்த்ததில்லை. எது இருக்கிறதோ அது போதும் என இயல்பாய் நடந்துகொள்வார்.

ஏன் அரசியல் பக்கம் போகவில்லை? என்று கேட்டால், “அது எனக்குத் தெரியாது” அரசியல் எனக்கு வராது? என்று சொல்வார்.  சமுதாயத்திற்கு சேவை செய்ய அரசியல்வாதியாகத்தான் இருக்க வேண்டும் என்ற அவசியம் இல்லை.

நான் அரசியல்வாதி இல்லை என்றாலும், சமுதாயத்திற்கு நன்மைகளைச் செய்கிற சிறந்த அரசியல் தலைவருக்கு எப்போதும் ஆதரவாக இருப்பேன். எனது பங்களிப்பு எப்போதும் அவர்களுக்குத் தொடரும் என்பார்.

பல பட்டங்கள் அவரைத் தேடி வந்தும்கூட, அதையெல்லாம் வேண்டாம் என்று நிராகரித்து, 'எனக்கு ஓம்ஸ் என்கிற அந்த அங்கீகாரமே போதும் என்று நிறைவாய் சொல்வார். அப்பாவின் இத்தகைய குணங்களும், எளிமையும்தான் அவரின் வெற்றிக்கும், ஓம்ஸ் அறவாரியத்தின் வளர்ச்சிக்கும்  முக்கியக் காரணம்.

அவரின் பாதையில், அவரின் வழிகாட்டுதலில் எப்போதும் மக்களின் நலனுக்காக, மக்களுக்காக மக்களோடு ஓம்ஸ் அறவாரியம் துணை நிற்கும் என்று உறுதிமொழிகிறேன்” என்று கூறினார்!

 இன்னிசை விருந்துபசரிப்பில், திரளான மக்களின் மகிழ்ச்சியில், வீனஸ் நிறுவனத்தின் பிரமாண்ட ஏற்பாட்டில் அன்பின் வெளிச்சம் ஐயாவின் பிறந்தநாளை அழகாக்கியது!