• Shan Siva
• 01 Aug, 2024

கோலாலம்பூர், ஆகஸ்ட் 1: மலேசியாவில் உள்ள இந்திய சமூகத்தின் B40 மக்களின் சமூகப் பொருளாதார மேம்பாடு தொடர்பான பிரச்சினைகளைக் கையாள்வதற்காக நிறுவப்பட்ட மலேசிய இந்திய சமூக உருமாற்றப் பிரிவான மித்ராவின் செயல் திட்டத்தின் இறுதி அறிக்கை_ பிரதமரிடம் சமர்ப்பிக்கப்பட்டுள்ளதாக நேற்று நடந்த பத்திரிகையாளர்கள் சந்திப்பில்  ஒருமைப்பாடு துறை துணை அமைச்சர் சரஸ்வதி கந்தசாமி கூறினார்.

மலேசிய இந்திய சமூகப் பொருளாதார மேம்பாட்டுத் திட்டத்தின் கீழ், மித்ராவிற்கு ஆண்டுதோறும் RM100 மில்லியன் ஒதுக்கப்படுகிறது. மனித மூலதன மேம்பாடு, தொழில்முனைவு மற்றும் தொழில் வளர்ச்சி, சமூக மேம்பாட்டுத் திட்டம் மற்றும் நலன், ஆன்மீகம் மற்றும் நல்வாழ்வு ஆகிய முக்கிய அம்சங்களுக்காக இந்த நிதி ஒதுக்கப்படுகிறது.

இனம்-மதத்தைக் கடந்து நாட்டு மக்களின் மேம்பாடு பாராபட்சம் இன்றி அமைய வேண்டும் என்ற நோக்கில் இவ்வாண்டு துவக்கத்தில் மித்ரா மீண்டும் தேசிய ஒருமைப்பாடு அமைச்சகத்தின் கீழ் வைக்கப்பட்டது. இந்த மாற்றத்தை தொடர்ந்து, மலேசியாவில் உள்ள இந்திய சமூகத்தின் சமூகப் பொருளாதார நிலையை மேம்படுத்த உதவும் வகையில் மித்ராவின் இலக்குகள் மற்றும் திசையைச் சீரமைக்கும் நோக்கத்துடன் மித்ராவிற்கான ‘செயல் திட்டம்’ ஒன்றை உருவாக்கும் பணியை ஒருமைப்பாடு அமைச்சு மேற்கொண்டதாக துணை அமைச்சர் சரஸ்வதி கந்தசாமி விளக்கினார்.

மித்ராவின் ஒவ்வொரு உதவியும் இந்திய சமுதாயத்தின் B40 மக்களுக்கு பயனளிப்பதை உறுதிப்படுத்துவதற்கு இந்த செயல் திட்டம் முக்கியமாகும். ஆகவே, முழுமையான ஆய்வை மேற்கொண்டு இந்த செயல் திட்டத்தை வரையறுக்க பெமாண்டு அசோசியேட்ஸ் என்ற நிறுவனம் நியமிக்கப்பட்டது. இதற்கான முழு செலவீனங்களையும் அமைச்சு ஏற்றுக்கொண்டது என்று அவர் கூறினார்.

முந்தைய மித்ரா திட்டங்களை செயல்படுத்துதல் மற்றும் மக்கள் மீதான அவற்றின் தாக்கம் பற்றிய ஆரம்பக் கருத்துக்களைப் பெறவும், பொது மக்களிடமிருந்து தரவு மற்றும் தகவல்களை சேகரிக்கவும் ஓர் ஆய்வை மேற்கொண்டது. புத்ராஜெயாவில் மித்ரா திசை செயல் திட்டப் பட்டறை அமர்வின் போது இந்த கருத்து சமர்பிக்கப்பட்டது.

பொது மக்களிடம் இருந்து அடையாளம் காணப்பட்ட சிக்கல்களைக் கையாள்வதற்கான வழிவகைகள் மித்ரா திசை செயல் திட்டப் பட்டறை அமர்வின் போது ஆழமாக விவாதிக்கப்பட்டது.

இந்தச் செயலமர்வில், பிற அமைச்சுக்களின் பிரதிநிதிகள், அரசு நிறுவனங்களின் பிரதிநிதிகள், அரச சார்பற்ற நிறுவனங்களின் பிரதிநிதிகள், சமூகம் மற்றும் மத சங்கங்களின் பிரதிநிதிகள், மற்றும் கல்வியாளர்களின் பிரதிநிதிகள் அடங்கிய 115 பேர் பங்கு பெற்றனர். பங்கேற்பாளகள், மித்ராவின் மூன்று (3) முக்கிய நோக்கங்களான மனித மூலதன வளர்ச்சி, தொழில்முனைவு மற்றும் தொழில் வளர்ச்சி, சமூக நலன், ஆன்மீகம் மற்றும் சமூகம் என்ற மற்றும் கூறுகளின் அடிப்படையின் கீழ் பட்டறை கலந்தாய்வுகளை நடத்தியதோடு, மித்ராவின் நிர்வாக மேம்பாடு, திட்ட நிர்வாக மேலாண்மை தொடர்பான கருத்துகளையும் அவர்கள் முன்வைத்தனர்.

இந்திய சமூகத்தில் சமூகப் பொருளாதார இடைவெளிக்கு முக்கிய காரணிகள், இன்றைய சூழ்நிலையில் மலேசிய இந்திய சமூகம் எதிர் கொள்ளும் பல சிக்கல்கள் மற்றும் சவால்கள் செயல் திட்டப் பட்டறையில் அடையாளம் காணப்பட்டன. உயர் வறுமை விகிதம், இந்தியர்களிடம் திறமையான தொழிலாளர் பற்றாக்குறை, கல்வியில் உயர் இடைநிற்றல் விகிதம், சமூக மற்றும் நலன் இளைய தலைமுறையினரிடையே கடுமையான குற்றச் செயல்கள் மற்றும் சுகாதார வசதிகளை அணுகுவதில் சிரமம் போன்றவை ஆய்வு செய்யப்பட்டது.

பட்டறையின் முடிவுகள், மலேசிய இந்திய சமூகத்தின் சமூகப் பொருளாதார நிலையை மேம்படுத்துவதற்கும், மேம்படுத்துவதற்கான உள்ள திட்ட முன்மொழிவுகள் மற்றும் முன்முயற்சிகளை உள்ளடக்கிய செயல் திட்டத்துடன் முழு அறிக்கையாக உருவாக்கப்பட்டுள்ளது.

அடுத்த கட்டமாக, மித்ரா புதிய திசைக்கு ஏற்ப செயல்படவும், அதன் திட்டங்களின் வெற்றியை உறுதிசெய்யவும் மித்ரா ஒரு முழுமையான அணுகுமுறையை எடுக்க வேண்டும் என்று பரிந்துரைக்கப்பட்டுள்ளது. முக்கியமாக மித்ராவின் கொள்கைகள் மற்றும் விதிகள் தொடர்பான முடிவுகளை எடுப்பதற்கு ஏதுவாக பிரதமரின் தலைமையில் மலேசிய இந்திய சமூக விவகார தேசிய மன்றம் நிறுவுதல், நடப்பு ஆண்டில் செலவழிக்கப்படாத ஒதுக்கீடுகளின் இருப்பை பயன்படுத்த மித்ரா அறக்கட்டளை கணக்கு ஒன்றை உருவாக்குதல், மலேசிய இந்திய சமூகத்தின் பொருளாதாரத்தை மேம்படுத்துவதில் திறமையான சேவை வழங்குவதை உறுதிசெய்ய மித்ராவின் நிறுவன கட்டமைப்பை மறுசீரமைத்தல் போன்ற பரிந்துரைகளும் திட்ட வரைவில் பரிந்துரைக்கப்பட்டுள்ளது. மித்ராவிற்காக வடிவமைக்கப்பட்டுள்ள திட்டங்கள் மற்றும் முன் முயற்சிகள் இந்திய சமுதாயத்தின் வாழ்க்கைத் தரத்தை மேம்படுத்துவதற்கு குறிப்பிடத்தக்க பங்களிப்பை வழங்கும்.  கூடுதலாக, தொடர்ச்சியான கண்காணிப்பு மற்றும் மதிப்பீடு செயல்படுத்தப்பட வேண்டும், இதனால் மலேசிய இந்திய சமூகம் உயர் சமூகப் பொருளாதார நிலை மற்றும் வாழ்க்கைத் தரத்தை அடையும் திறனைக் கொண்டுள்ளது என்று தாம் உறுதியாக நம்புவதாக துணை அமைச்சர் சரஸ்வதி கந்தசாமி.

தேசிய ஒருமைப்பாடு அமைச்சர் டத்தோ ஆரோன் அகோ டாகாங் உத்தரவின் பெயரில் ஜூலை 17ஆம் தேதியன்று, மித்ராவின் இந்த திசை செயல் திட்டத்தின் இறுதி அறிக்கையை பிரதமர் டத்தோஸ்ரீ அன்வார் இப்ராஹிமின் கவனத்திற்கு கொண்டு சென்று, அவரிடம் நேரடியாகச் சமர்ப்பித்து விளக்கம் அளித்ததாகவும், பிரதமர் தேசிய ஒருமைப்பாடு அமைச்சின் இந்த பெருமுயற்சியில் மன மகிழ்ச்சி அடைந்ததாகவும் அவர் கூறினார்!