• Shan Siva
• 10 Oct, 2024

கிழக்கு கடற்கரை ரயில் இணைப்பு திட்டமான  (ECRL) திட்டம் செப்டம்பர் மாத நிலவரப்படி 72.93% முன்னேற்றத்தை எட்டியுள்ளது என்று போக்குவரத்து அமைச்சர் அந்தோணி லோக் கூறினார்.

டிசம்பர் 2026 இல் கோத்தா பாருவில் இருந்து கோம்பாக் ஒருங்கிணைந்த போக்குவரத்து முனையம் வரையிலான ECRL பாதையில் முடிவடைவதற்கான காலக்கெடுவிற்கு ஏற்ப இந்த முன்னேற்றம்  இருப்பதாக லோக் கூறினார்.

இதற்கிடையில் கோம்பாக்கில் இருந்து போர்ட் கிள்ளான் வரையிலான ரயில் பாதை 2027 டிசம்பரில் நிறைவடையும் என்று எதிர்பார்க்கப்படுவதாக அவர் கூறினார்.

திரெங்கானுவின் முன்னேற்றம், 87.4 விழுக்காடாக, இந்த மெகா திட்டத்தின் கீழ் மற்ற மாநிலங்களான சிலாங்கூர், கிளந்தான் மற்றும் பகாங் ஆகியவற்றை விட முன்னிலையில் உள்ளது என்று அவர் குறிப்பிட்டார்.

2027, ஜனவரி ஒன்றாம் தேதி கோத்தா பாரு மற்றும் கோம்பாக் இடையே ரயில் சேவைகள் தொடங்குவதே தங்கள் இலக்கு. இதுபோன்ற முன்னேற்றத்துடன், தாங்கள் திட்டமிட்டபடி செயல்படுகிறோம் என்று தாம் நம்புவதாக அவர் கூறினார்.

நேற்று கோலா திரெங்கானுவில் Malaysia Rail.Link Sdn Bhd (MRL) மற்றும் East Pacific Industrial Corporation Bhd (EPIC Bhd) ஆகியவற்றுக்கு இடையே புரிந்துணர்வு ஒப்பந்தம் (MoU) கையெழுத்தானதனை அடுத்து அவர் செய்தியாளர்களிடம் இவ்வாறு கூறினார்.

மலேசியாவின் ஆழமான துறைமுகங்களில் ஒன்றான கெமாமன் துறைமுகத்தை இசிஆர்எல் சேவைகள் மற்ற துறைமுகங்கள், தொழில் பூங்காக்கள், வணிக மையங்கள் மற்றும் ரயில் பாதையில் உள்ள சுற்றுலா மண்டலங்களுடன் இணைக்க இந்த புரிந்துணர்வு ஒப்பந்தம் உதவும் என்று அவர் குறிப்பிட்டார்.

இணைப்பை மேம்படுத்துதல் மற்றும் பொருளாதார வளர்ச்சியைத் தூண்டுதல் ஆகியவற்றை இலக்காகக் கொண்டு, ECRL, கிளந்தான், திரெங்கானு, பகாங் மற்றும் சிலாங்கூர் ஆகிய இடங்களைக் கடந்து, குறிப்பாக மலேசியாவின் போக்குவரத்து வலையமைப்பை மேம்படுத்துவதில் பொருளாதார மாற்றத்தை ஏற்படுத்துவதாக அவர் விளக்கினார்.

அடுத்த மாதம் திரெங்கானுவில் எதிர்பார்க்கப்படும் பருவமழையால் 665 கிமீ ECRL திட்டம் பாதிக்கப்படுமா என்று கேட்டதற்கு, MRL மற்றும் China Communications Construction Company Ltd ஆகியவை ஏற்கனவே இந்த விஷயத்தை கவனத்தில் எடுத்துக்கொண்டதாக அவர் கூறினார்.

இசிஆர்எல் பாதையின் சில பகுதிகள் வெள்ளத்தைத் தவிர்க்க, மேம்பாலங்கள் உட்பட உயரமான அமைப்புகளில் கட்டப்படும் என்று தெரிவித்தார்!